खोज

दाङ, ३२ असार ।

दाङमा वर्षेनि सवारी साधन दुर्घटना बढ्दै गएको छ । चालकको लापवारही र जोखिम सडकका कारण दुर्घटना बढेको बताइएको छ । ट्राफिक प्रहरी कार्यालय दाङको रेकर्डमा वर्षेनि दुर्घटना बढेको देखाएको हो ।

आर्थिक वर्ष २०७९/०८० मा एक सय ४८ दुर्घटना भएकोमा एक सय ४७ दुर्घटना चालककै लापरवाही र सडकको कारणले भएको हो । गत आर्थिक वर्ष २०८०/०८१ मा भएका दुई सय तीन दुर्घटनामध्ये एक सय ९२ र चालु आर्थिक वर्ष २०८१/०८२ मा भएका तीन सय ६० दुर्घटनामध्ये दुई सय ४५ दुर्घटना भएका छन् । ओभरलोड, सडक तथा मौसमको अवस्था एवं यात्रुका गल्तीले पनि दुर्घटना भएका छन् ।

जिल्ला ट्राफिक प्रहरी कार्यालय दाङका प्रमुख प्रहरी निरीक्षक उपेन्द्रबहादुर बमले मापसे तथा लापसे गरेर सवारी साधन चलाउने, मोवाइल फोनमा कुरा गर्दै सवारी साधन चलाउने, ट्राफिक नियमको पालना नगर्ने, तीब्र गतिमा सवारी साधन चलाउने जस्ता धेरै लापरवाहीका कारण सवारी दुर्घटना बढेको बताए ।

जिल्ला ट्राफिक प्रहरीका अनुसार आर्थिक वर्ष २०७९/०८० मा भएका एक सय ४८ दुर्घटनामा ५४ जनाको मृत्यु भएको छ । त्यसवर्ष एक सय ४१ गम्भीर घाइते भएका छन् भने एक सय आठजना सामान्य घाइते भएका छन् । गत आर्थिक वर्ष २०८०/०८१ मा भएका दुई सय तीन दुर्घटनामा परेर ९८ जनाको ज्यान गयो भने दुई सय ३८ जना गम्भीर र एक सय १४ जना सामान्य घाइते भए । चालु आर्थिक वर्ष २०८१/०८२ मा भएका तीन सय ६० दुर्घटनामा परेर ८१ जनाको ज्यान गयो । दुई सय ५८ गम्भीर र तीन सय ४१ सामान्य घाइते भए ।

ट्राफिक प्रहरीले उमेर समूहको आधारमा २५ देखि ४० वर्षका धेरै दुर्घटनामा परेको जनाएको छ । चालकको उमेरको आधारमा यस वर्ष २५ देखि ४० वर्ष उमेर समूहका दुई सय २६, १६ देखि २५ वर्ष उमेरका एक सय ३६ र ४० वर्ष माथिका एक सय २४ दुर्घटनामा परेका छन् । स्थानीय तहगत रुपमा दुर्घटनाको अवस्था हेर्दा सबै भन्दा धेरै तुलसीपुर उपमहानगरपालिकामा यस वर्ष एक सय एक दुर्घटना भएका छन् भने दुर्घटनाबाट २३ जनाको मृत्यु भएको र एक सय ७८ जना घाइते भएका छन् । घोराही उपमहानगरपालिकामा यस वर्ष भएका ८६ दुर्घटनामा २० को मृत्यु र एक सय ३१ घाइते भएका छन् । लमही नगरपालिकामा भएका ७४ दुर्घटनामा १८ को मृत्यु र एक सय १२ घाइते भएका छन् ।

राप्ती गाउँपालिकामा ४५ दुर्घटना हुँदा १२ को मृत्यु ८२ जना घाइते, गढवामा १९ दुर्घटना हुँदा दुईको मृत्यु ४८ घाइते, दंगीशरणमा भएका १३ दुर्घटनामा दुईको मृत्यु १९ घाइते, बबईमा भएका नौ दुर्घटनामा एकको मृत्यु ११ घाइते, शान्तिनगरमा भएका आठ दुर्घटनामा एकको मृत्यु ११ घाइते, बंगलाचुलीमा भएका दुई दुर्घटनामा एकको मृत्यु चार घाइते र राजपुरमा भएका तीन दुर्घटनामा एकको मृत्यु तीनजना घाइते भएका छन् ।

यस वर्ष सबै भन्दा धेरै शुक्रबार ५९ र आइतबार ५७ दुर्घटना भएका छन् । ट्राफिक प्रहरी प्रमुख बमले शुक्रबार र शनिबार मापसे गर्ने भएकोले शनिबार रातिका दुर्घटना आइतबारको रेकर्डमा देखिएको बताउँदै धेरै दुर्घटना रातिकै समयमा भएको जानकारी दिएका छन् । उनका अनुसार ट्राफिक सचेतनाको कार्यक्रम भैरहेको भए पनि दुर्घटनामा कमी आउन नसकेको बताए ।।