खोज

बुटवल, २९ असार  ।

बुटवलमा आयोजित प्रदेश स्तरीय शैक्षिक सम्मेलन सम्पन्न भएको छ । काठमाण्डौं विश्वविद्यालय र प्याब्सन रुपन्देहीको संयुक्त आयोजना रहेको शैक्षिक सम्मेलनमा ३०० बढी शिक्षक, प्रतिनिधी, खोजकर्ता, शिक्षाविद् एवँ सरोकारवालाहरुको सहभागिता रहेको थियो । कार्यक्रमको प्रदेश सरकारका भौतिक पुर्वाधार विकाशमन्त्री भुमिश्वर ढकालले उद्घाटन गरे ।

त्यसक्रममा मन्त्री ढकालले समाज रुपान्तरणमा शिक्षाको महत्वपूर्ण भूमिका रहने बताउदै निजी विद्यालयका शिक्षकहरुको पेशागत सीप र क्षमता अभिवृद्धिका लागि यस्ता कार्यक्रम उपयोगी हुने विश्वास व्यक्त गरे । मन्त्री ढकालले शैक्षिक क्षेत्रको विकासका लागि निजि विद्यालयहरुले पुर्याएको योगदान अतुलनीय रहेको बताए । उनले शैक्षिक क्षेत्रको विकाससँगै नयाँ आयाम र विकासक्रम थपिदै जादा शिक्षक, अध्यापकहरु पनि जुझारु, मेहनति तथा चनाखो भई काम गर्नुपर्ने बेला आएको बताए ।

निजी तथा आवासीय विद्यालय अर्गनाइजेशन प्याब्सन रुपन्देहीका अध्यक्ष दीपक खनालको अध्यक्षतामा रहेको कार्यक्रममा मुख्य वक्ता काठमाण्डौ विश्वविद्यालय स्कुल अफ एजुकेशनका डिन प्रा.डा. बालचन्द्र लुइटेलले शैक्षिक क्षेत्रको विकास र शिक्षामा काठमाण्डौ युनिभर्सिटीले पुर्याएको योगदानका बारेमा चर्चा गरेका थिए ।

कार्यक्रममा प्याब्सन नेपालका केन्द्रीय उपाध्यक्ष टिकाराम न्यौपाने शैक्षिक विकासमा निजी क्षेत्रबाट भएका प्रयासहरु सकारात्मक भएकाले राज्यले यसतर्फ ध्यान दिनु आवश्यक रहेको बताए । सो अवसरमा उपाध्यक्ष न्यौपानेले प्याब्सनका केन्द्रीय अध्यक्ष कृष्ण अधिकारीले दिनु भएको कार्यशाला सफलताको शुभकामना मन्तब्य आफैले पढेर सुनाएका थिए ।

सम्मेलनमा प्याब्सन प्रदेश अध्यक्ष लालहरि पाण्डे, शिक्षा विकास तथा समन्वय इकाइका प्रमुख माधव बन्जाडे, केयुका प्राध्यापक मदन रिजाल लगायतले शैक्षिक क्षेत्रमा भएका नयाँ नौला र बहुपक्षिय आयाम र तिनको प्रगतिका बारेमा चर्चा परिचर्चा गरेका थिए ।

विभिन्न सत्रमा शनिबार दिनभरि नै चलेको सम्मेलनमा ३ सय बढी शिक्षक, प्रतिनिधी, खोजकर्ता, शिक्षाविद् एवं सरोकारवालाहरुको सहभागिता रहेको प्याब्सन रुपन्देही सचिव बोधराज गौडेलले बताए । शैक्षिक सम्मेलनमा ५ वटा कार्यशालामा छलफल चलाइनुका साथै करिव २० वटा भन्दा बढी खोजपत्र पेश पेश गरिएको थियो । शैक्षिक क्षेत्रमा भएको विकास तथा रुपान्तरणात्मक अभ्यासको विषयमा समुहगत छलफल चलाइएको सम्मेलनमा उद्धघाटन सत्रको सन्चालन भने प्याब्सन तिलोत्तमा नगर सचिव चन्द्र अधिकारीले गरेका थिए ।