खोज

बर्दघाट  ।

बर्दघाट साहित्य समाजको “साहित्य दर्पण अङ्क-३” विमोचन गरिएको छ ।आदिकवि भानुभक्त आचार्यको २१२ औँ भानु जयन्तीको अवसरमा एक कार्यक्रमका बिच बर्दघाट  नगर प्रमुख शम्भुलाल श्रेष्ठले साहित्य दर्पणको विमोचन गरेका हुन ।

कार्यक्रममा बोल्दै नगर प्रमुख श्रेष्ठले बर्दघाटमा भएका साहित्यिक गतिविधिहरूले नयाँ प्रतिभाको प्रस्फुटन सँगै बर्दघाटको चिनारीका लागि महत्त्वपूर्ण टेवा पुर्‍याएको उल्लेख गर्दै साहित्य क्षेत्रको विकासमा टेवा पुर्‍याउन नगरपालिका सधैँ साथमा रहने प्रतिबद्धता व्यक्त गरे ।

बर्दघाट नगरपालिकाका उपप्रमुख रुद्र प्रकाश उपाध्यायले पछिल्लो समय साहित्यिक गतिविधिले नगरको आकाश गुञ्जायमान भएको बताए ।उनले सामाजिक समस्या र भावनाहरूलाई समेत कला र साहित्य क्षेत्रले समेट्दै समाज रूपान्तरणमा महत्त्वपूर्ण भूमिका खेल्ने विश्वास व्यक्त  गरे ।

बर्दघाट प्रज्ञा प्रतिष्ठानका कुलपति डा.घनश्याम न्यौपाने”परिश्रमी”ले भानु जयन्तीका अवसरमा भारतको सिक्किम लगायत नेपाली भाषी रहेका भारतका विभिन्न क्षेत्रमा बृहत् कार्यक्रम आयोजना हुने र उनको योगदानलाई निकै महत्वका साथ चर्चा सम्मान गरिने र आजका दिन सिक्किममा बिदा समेत दिइने गरिएको बताए ।

नेपालले भने आदिकवि भानुभक्तलाई उचित सम्मान दिन नसकेको कुलपति न्यौपाने बताए ।साहित्य समाजका अध्यक्ष विश्वप्रकाश भट्टराईले साहित्य दर्पण अङ्क ३ मा विद्यालयका विद्यार्थी भाईबहिनीहरुको रचनाहरू समावेश गरी उनीहरूलाई साहित्य तर्फ आकर्षित गराउन प्रेरित गरिएको उल्लेख गरे ।नयाँ पुस्तालाई आकर्षित गराउन र प्रतिभा प्रस्फुटनका लागि बर्दघाट साहित्य  समाजले विभिन्न फोरमहरू तयार गरेको समेत भट्टराईले बताए ।

बर्दघाट साहित्य समाजद्वारा आयोजित कार्यक्रममा संस्थापक अध्यक्ष दिनानाथ पौडेलले साहित्य दर्पण अङ्क ३ को समीक्षा गरेका थिए भने समाजका सदस्य एवम् बुटवल बहुमुखी क्याम्पसका प्राध्यापक शेषकान्त पौडेलले भानुभक्तको योगदानका बारेमा चर्चा गरेका थिए ।कार्यक्रममा विभिन्न विद्यालयका विद्यार्थीहरूले आ आफ्ना रचना वाचन गरेका थिए ।