खोज

सुर्खेत,२९ असार । सुर्खेतको वीरेन्द्रनगर नगरपालिकाले पहिलोपटक बजार क्षेत्रमा ट्राफिक बत्ती सञ्चालनमा ल्याइएको छ । सवारी चाप र दुर्घटनाको जोखिमलाई न्यूनीकरण गर्ने उद्देश्यका साथ वडा नम्वर ६ स्थित वीरेन्द्रचोकमा पालिकाले ट्राफिक बत्ती सञ्चालनमा ल्याइएको हो ।

वीरेन्द्रचोकबाट सुरुवात गरिएको ट्राफिक बत्ती अन्य क्षेत्रमा पनि विस्तार गरिने नगर प्रमुख मोहनमाया ढकालले जानकारी बताइन् । सवारी चाप हुने अन्य चोकहरुमा पनि ट्राफिक बत्ती जडान गर्ने तयारी गरिएको छ । चालु आर्थिक वर्षमा वीरेन्द्र चोकमा ट्राफिक बत्ती जडान गर्न नगरपालिकाले ३० लाख रूपैयाँ विनियोजन गरेको थियो ।

नगरप्रमुख ढकालले प्रदेश राजधानी भएसँगै वीरेन्द्रनगरमा सवारी चाप बढ्दै गएको र यसलाई व्यवस्थित बनाउन जरुरी रहेकाले ट्राफिक बत्ती जडान गरिएको जनाइन् । ट्राफिक बत्ती जडानको कामले मुख्य सडकहरु व्यवस्थित हुने र पैदलयात्रीहरुको सुरक्षित र सहज बनाउन सहयोग पुग्ने बताइन् । जसले गर्दा ट्राफिक व्यवस्थापनमा सहयोग पुग्नेछ ।

नगरप्रमुख ढकालले उपत्यकाका विभिन्न स्थानमा सुरक्षा संवेदनशिलतालाई मध्यनजर गर्दै झण्डै तीन सय बढी सीसी क्यामेरासमेत जडान गर्न लागिएको जानकारी गराइन् । यस्तै नगरपालिकाले आगामी वर्षसम्म यात्रु र सवारीको उच्च चाप हुने मंगलगढी चोकमा आकाशे पुल निर्माण सम्पन्न गर्नेगरी प्रक्रिया पनि अघि बढाएको छ । यसको लागि दुई करोड बजेट व्यवस्थापन भइ ठेक्का प्रक्रिया अघि बढाइएको नगरपालिकाले जनाएको छ ।