काठमाडौं, २९ असार ।
राष्ट्रिय प्रजातन्त्र पार्टी (राप्रपा) भित्र नेतृत्वको एकलौटी निर्णयप्रति असन्तुष्ट बनेका वरिष्ठ नेताहरू निर्वाचन आयोगमा पुगेका छन्। अध्यक्ष राजेन्द्र लिङ्देनले विधानविपरीत पार्टीका केही नेताहरूलाई हटाएको भन्दै असन्तुष्ट पक्षले औपचारिक उजुरी दिएका हुन्।
पूर्व अध्यक्ष डा. प्रकाशचन्द्र लोहनी, महामन्त्री धवलशम्शेर राणा, र अनुशासन समितिबाट हटाइएका नवराज सुवेदीसहितको समूह आइतबार आयोगसँग छलफलमा जुटेको हो। शनिबार सम्पन्न छुट्टै भेलाले अध्यक्ष लिङ्देनको पछिल्ला निर्णयहरूलाई असंवैधानिक भन्दै विरोध जनाउने र कानुनी बाटो अवलम्बन गर्ने निर्णय गरेको थियो।
केही दिनअघि लिङ्देनले सगुन सुन्दर लावतीलाई प्रवक्ताबाट बर्खास्त गरेका थिए भने नवराज सुवेदीलाई हटाएर रोशन कार्कीलाई अनुशासन संयोजकमा नियुक्त गरेका थिए। असन्तुष्ट समूहले यी निर्णय पार्टी विधानअनुसार केन्द्रीय समितिमा छलफल र निर्णय बिना गरिएको भन्दै आपत्ति जनाएको छ।
लिङ्देन नेतृत्वप्रति बढ्दो असन्तोष र संस्थापनइतर समूहको सक्रियताले पार्टीभित्रको फाटो अझै गहिरिएको छ। अब आयोगको निर्णयले राप्रपाको आन्तरिक शक्ति सन्तुलनमा ठूलो प्रभाव पार्न सक्ने देखिन्छ।
