खोज

काठमाडौँ ।

विश्व जनसंख्या दिवसका अवसरमा आयोजित कार्यक्रममा प्रधानमन्त्री केपी शर्मा ओलीले जनसंख्या विकासको मूल आधार भएकाले यसको सन्तुलित व्यवस्थापन अपरिहार्य रहेको स्पष्ट पार्नुभयो। स्वास्थ्य तथा जनसंख्या मन्त्रालयले आयोजना गरेको कार्यक्रममा राष्ट्रिय जनसंख्या नीति, २०८२ सार्वजनिक गर्दै उहाँले जनसंख्या वृद्धि र विकासको गति सँगसँगै अगाडि बढ्नुपर्नेमा जोड दिनुभयो।

प्रधानमन्त्री ओलीले जनसंख्यालाई केवल संख्याको हिसाबले नहेरी मानव अस्तित्वको आधारका रूपमा लिन आग्रह गर्नुभयो। “मानिस भएकाले देशको अर्थ छ, धर्तीको अर्थ छ,” भन्दै उहाँले मानवविना राष्ट्रको कल्पना असम्भव हुने बताउनुभयो। जनसंख्याको विषयमा गोष्ठी र सेमिनार त गरिने तर अर्कोतर्फ मानवीय विनाशका हतियार उत्पादन गरिँदै गरेको विरोध गर्दै उहाँले यस्तो प्रवृत्तिले मानव जातिको अस्तित्वलाई नै संकटमा पार्न सक्ने चेतावनी दिनुभयो।

उहाँले पछिल्लो समय सन्तान जन्माउने विषयमा सामाजिक सन्देशहरूले भ्रम सिर्जना गरिरहेको भन्दै चिन्ता व्यक्त गर्नुभयो। “चालीस कटेपछि रमाउला भन्ने गीतमा अल्झनु हुँदैन,” भन्दै उहाँले समयमा विवाह गरेर ३० वर्ष नपुग्दै तीन सन्तान जन्माउनुपर्ने सन्देश दिनुभयो। उहाँले सन्तानको विषयलाई व्यक्तिगत स्वार्थभन्दा पृथ्वी र मानवताको उत्तरदायित्वका रूपमा लिनुपर्ने बताउनुभयो।

प्रधानमन्त्री ओलीले सरकारले विवाहका लागि २० वर्ष उमेर तोकेको भए पनि, सामाजिक जिम्मेवारीका आधारमा समयमै वैवाहिक जीवन सुरु गर्नुपर्ने आवश्यकता औँल्याउनुभयो। उहाँले विकासशील मात्र होइन, विकसित देशहरूमा समेत जनसंख्या ऋणात्मक बन्दै गएको अवस्थामा मानव अस्तित्व नै संकटमा पर्ने खतरा रहेको उल्लेख गर्नुभयो।

कार्यक्रमको अन्त्यतिर प्रधानमन्त्री ओलीले सन्तुलित जनसंख्या व्यवस्थापनमार्फत समृद्धि, अस्तित्व र मानव कल्याणको सुनिश्चितताका लागि सबै पक्ष एकजुट भई काम गर्नुपर्ने आह्वान गर्नुभयो।