खोज

काठमाडौं ।

ज्येष्ठ नागरिकको जीवनलाई सुरक्षित, गुणस्तरयुक्त र सम्मानित बनाउने उद्देश्यसहितको जरुरी सार्वजनिक महत्वको प्रस्ताव राष्ट्रिय सभामा दर्ता गरिएको छ। प्रस्ताव नेकपा (एमाले) की सांसद सुमित्रा विसीले दर्ता गराएकी हुन् भने सांसदहरू उर्मिला अर्याल, कमला पन्त, भगवती न्यौपाने, मायाप्रसाद शर्मा, मदनकुमारी शाह (गरिमा), पदमबहादुर परियार र पूजा चौधरीले समर्थन जनाएका छन्।

प्रस्तावमा हाल युवाको तीव्र विदेश पलायनका कारण घर–परिवारमा एक्लिएर बस्नुपरेका ज्येष्ठ नागरिकको सुरक्षामा चुनौती थपिँदै गएको उल्लेख गर्दै, राज्यले यसप्रति गम्भीर ध्यान दिनुपर्ने माग गरिएको छ।

सांसद विसीले संसदमा बोल्दै ज्येष्ठ नागरिकको स्वास्थ्य उपचार निःशुल्क गराउने, हवाई र सार्वजनिक यातायातमा छुट दिने, साथै बैंकमा निष्क्रिय रहेका खाताका रकमलाई ज्येष्ठ नागरिक कोषमा लैजाने व्यवस्था गर्नुपर्ने प्रस्ताव राखेकी हुन्। साथै, उनले ज्येष्ठ नागरिकको वर्गीकरण र अवस्था मूल्यांकनका आधारमा सुविधा दिने नीतिगत व्यवस्था आवश्यक रहेको बताइन्।

प्रस्तावमाथिको छलफलमा सहभागी अन्य सांसदहरूले समेत राज्यले ज्येष्ठ नागरिकप्रति जिम्मेवार भूमिका निर्वाह गर्न ढिला नगर्नुपर्ने धारणा राख्दै, नीति तथा कार्यक्रममै यो विषयलाई प्राथमिकता दिनुपर्ने सुझाव दिएका छन्।