सामग्री खोज्नुहोस्

काठमाडौँ ।

अमेरिकी राष्ट्रपति डोनाल्ड ट्रम्पले आगामी अगस्ट १ देखि क्यानडाबाट आयात हुने सामानहरूमा ३५ प्रतिशत कर लगाउने घोषणा गरेका छन्। सामाजिक सञ्जालमार्फत सार्वजनिक गरिएको पत्रमा उनले यो निर्णय क्यानडासँगको व्यापार सन्तुलन मिलाउन र घरेलु उद्योगलाई संरक्षण गर्न गरिएको बताएका छन्।

हाल अमेरिकाले क्यानाडाली सामानहरूमा २५ प्रतिशतसम्मको कर लगाइसकेको छ। यद्यपि यो नयाँ निर्णयसँगै ‘यूएसएमसीए’ मुक्त व्यापार सम्झौता—अमेरिका, क्यानडा र मेक्सिकोबीचको— थप संकटमा परेको देखिएको छ। जुलाई २१ सम्म सम्झौता गर्नुपर्ने लक्ष्यसहित व्यापारिक वार्ता जारी रहे पनि ट्रम्पको पछिल्लो कदमले समयसीमामा अनिश्चितता उत्पन्न भएको अन्तर्राष्ट्रिय समाचार संस्था एएफपीले जनाएको छ।

यसै सन्दर्भमा क्यानडाका प्रधानमन्त्री मार्क कार्नीले आफ्नो देशका कामदार र व्यवसायहरूको हितमा नीतिहरू लागू गर्नुपर्ने आवश्यकता औंल्याउँदै अमेरिकासँग वार्ता जारी राख्ने संकेत दिएका छन्।

ट्रम्पले यसै हप्ता २० भन्दा बढी अन्य साझेदार देशहरूलाई पनि पत्र पठाएका छन्। उनले युरोपेली संघमाथि नयाँ कर लगाउने चेतावनी समेत दिएका छन्।

ट्रम्पको यस्तो एकपक्षीय निर्णयले बहुपक्षीय व्यापार सम्झौताहरूमा थप अविश्वास बढाउने जोखिम देखिएको छ। विश्लेषकहरूका अनुसार, यस्तो कदमले वैश्विक आपूर्ति श्रृङ्खला, बजार स्थिरता, र अमेरिका-क्यानडा सम्बन्धमा नकारात्मक असर पार्न सक्छ।