खोज

 काठमाडौं, २७ असार ।

त्रिभुवन विश्वविद्यालय (त्रिवि) ले अध्ययन बिदाको दुरुपयोग गर्ने शिक्षक तथा कर्मचारीबाट असुल गरिने रकम अब निवृत्तिभरण कोष वृद्धिका लागि प्रयोग गर्ने भएको छ। आर्थिक वर्ष २०८२/८३ को बजेटमा त्रिविले यसबारे स्पष्ट प्रावधानसमेत उल्लेख गरेको छ।

त्रिविका रजिस्ट्रार केदारप्रसाद रिजालका अनुसार विश्वविद्यालय मातहतका विभिन्न निकायबाट उच्च शिक्षा अध्ययन बिदा लिएर तोकिएको उपाधि नलिएका वा अध्ययनपछि विश्वविद्यालयमा नफर्किएका कर्मचारी र प्राध्यापकहरूबाट असुल गरिने रकम निवृत्तिभरण कोषमा जम्मा गरिनेछ।

गत वर्ष अध्ययन बिदा लिने नाममा विदेश गइ उतै बस्ने, डिग्री नलिइ फर्किने, तलब-भत्ता खानुका बाबजुद सेवामा नफर्किने लगायतका घटनाहरू सार्वजनिक भएपछि त्रिविले छानबिन समिति गठन गरेको थियो। समितिको प्रतिवेदनअनुसार झण्डै ४ सय प्राध्यापकले अध्ययन बिदाको दुरुपयोग गरेका थिए, जसबाट विश्वविद्यालयलाई करिब २ अर्ब रुपैयाँ बराबरको आर्थिक क्षति पुगेको उल्लेख गरिएको छ।

त्रिविले ती शिक्षक तथा कर्मचारीबाट उक्त रकम असुल गर्न प्रक्रिया अघि बढाइसकेको छ। विश्वविद्यालयले यस कदमबाट आर्थिक अनुशासन कायम हुने विश्वास व्यक्त गरेको छ। साथै, यसबाट उठ्ने रकम विश्वविद्यालयको दीर्घकालीन कोषमा योगदान पुर्‍याउने विश्वास गरिएको छ।

रजिस्ट्रार रिजालका अनुसार, “अब बिदा लिएर नफर्किने, वा तोकिएको डिग्री नलिनेहरूमाथि कडा कारबाही हुनेछ। यससँगै विश्वविद्यालयको आर्थिक अनुशासन बलियो हुने र कर्मचारीको उत्तरदायित्वबोध पनि बढ्नेछ।”