खोज

बुटवल, २६ असार ।

रुपन्देहीको सियारी गाउँपालिकाका ४७६ जनालाई बिहीबार जग्गाधनी पुर्जा वितरण गरिएको छ ।

विगत लामो समयदेखि बसोबास गर्दै आए पनि आफ्नो स्वामित्व नभएका सियारी गाउँपालिकाका वडा नं. १, २, ३, ४ र ५ का स्थानीयलाई भूमि आयोग र गाउँ ब्लकको गरी ४७६ जनालाई लालपुर्जा वितरण गरिएको गाउँपालिका अध्यक्ष थानेश्वर घिमिरेले जानकारी दिए ।

नापी कार्यालय रुपन्देही तथा भूमि समस्या समाधान आयोग जिल्ला कार्य समिति रुपन्देही तथा सियारी गाउँपालिकाको संयुक्त आयोजनामा लालपुर्जा वितरण गरिएको घिमिरेले बताए । कार्यक्रममा जिल्ला समन्वय समिति रुपन्देही प्रमुख उमाकान्त चपाईले सुकुम्बासी समस्या दीगो रुपमा समाधान गर्ने सरकारको लक्ष्य अनुरुप लालपुर्जा वितरण गरिएकोमा सह्राहना गर्दै निरन्तरता दिन आग्रह गरे ।

सो अवसरमा बोल्दै भूमि समस्या समाधान आयोग रुपन्देहीका अध्यक्ष कुमार थापा मगरले कन्चनबाट सुरु भएको अभियान सियारी हँुदै रुपन्देहीका अन्य क्षेत्रमा पनि विस्तार गर्ने लक्ष्य राखिएको बताए ।

उनले आगामी दिनमा रुपन्देहीका अन्य क्षेत्रमा पनि क्रमशः पुर्जा वितरण गर्ने योजना रहेको बताए । कार्यक्रममा जिल्ला समन्वय समिति प्रमुख चपाईँ तथा भूमि समस्या समाधान आयोग रुपन्देहीका अध्यक्ष कुमार थापा मगरले स्थानीय प्रेम बहादुर दर्जीलाई पुर्जा हस्तान्तरण गरेर लालपूर्जा वितरण कार्य प्रारम्भ गरेका थिए ।

पुर्जा प्राप्त गरेकोमा हर्ष ब्यक्त गर्दै दर्जीले वर्षौको आफ्नो सपना पूरा भएको भन्दै लालपुर्जा वितरण अभियानलाई दिगो रुपमा अघि बढाउन आग्रह गरे ।

कार्यक्रममा सियारी गाउँपालिका उपाध्यक्ष तारा थारु लगायतले पालिकाको समग्र वस्तुस्थितिबारे जानकारी गराउँदै मन्तब्य व्यक्त गरेका थिए ।