खोज

विगत तीन दिनदेखि देशका विभिन्न स्थानमा गएको प्राकृतिक प्रकोपमा परि प्रभावित हुनेहरूको सङ्ख्या बढ्दै गएको छ । रसुवामा सोमबार राती आएको बाढीमा परेकामध्ये नौ जनाको मृत्यु भएको छ । अझै १९ जना बेपत्ता रहेका छन् । बाढीमा परि दुई प्रहरी, ६ जना चिनियाँ नागरिक र ११ जना सर्वसाधारण बेपत्ता छन् । यस्तै ५७ जनाको उद्धार भएको प्रहरीले सार्वजनिक गरेको विवरणमा उल्लेख छ । बाढीले नेपाल चीन सीमा क्षेत्रको मितेरी पुल बगाएको, २४ वटा कन्टेनर, ६ वटा ट्रक र ३५ वटा ईभी गाडी बगाएको छ । धुञ्चेदेखि टिमुरे जाने सडकसमेत अवरुद्ध भएको छ । रसुवागढी हाइड्रोको ड्याम, भन्सार कार्यालय रसुवाको यार्डमा समेत क्षति भएको छ ।

हिमताल फुटेका कारण रसुवामा एक्कासि रातीमा ठुलो बाढी आएको मौसमबीदहरूले दाबी गरेका छन् । रसुवामा मात्रै होइन, नेपालका अरू प्रदेशमा पनि भारी वर्षाको चेतावनी दिइएको छ । जसका कारण यही लुम्बिनी प्रदेशका विभिन्न जिल्लामा पनि ठुलो भौतिक क्षति हुन सक्ने भएकोले पूर्व सतर्कता अपनाउन आग्रह गरिएको छ । विगतका बर्षमा पहिरो, बाढी र डुबान हुँदा मानवीय क्षतिसँगै करोडौँ बराबरको भौतिक क्षति भएको थियो । अर्कोतर्फ भारी वर्षा हुँदा पूर्व पश्चिम महेन्द्र राजमार्गमा भारी वर्षाले उक्त क्षेत्र डुबानमा पर्ने हुँदा सचेत हुनुपर्ने अवस्था उत्पन्न भएको छ । सडक डिभिजन कार्यालयले यो विषयमा गम्भीरता देखाउनु जरुरी छ ।

अहिले सडक विस्तारको काम भइरहेकोले सडक क्षेत्र थप जोखिममा छ । त्यसै गरी सडकमा पानी भरिएर खोला बनेको अवस्थाले साना सवारीका साधनमा ठुलो जोखिम देखिएको छ । पहाडमा पहिरो र तराईमा बाढी अनि डुवान प्रत्येक वर्ष नेपालीहरूका लागि यसरी नै समस्या वनेर आउने गरेको छ । यो वर्षमात्रै अहिलेसम्म बाढी पहिरोको बितण्डाले दुई दर्जन नेपालीको मृत्यु भैसकेको । दर्जनौं घाईते भएका छन् । कैयौ घरबारविहीन भएका छन् । उता पूर्वी पहाडका विभिन्न जिल्लामा पहिरोमा परेर प्रभावित हुनेको सङ्ख्या पनि बढ्दो छ ।

दर्जनौं व्यक्ति घाईते भएका छन् । करोडौँ सम्पत्तिको क्षति भएको छ । तराईको तुलनामा पहाडमा प्राकृतिक प्रकोपको ठुलो जोखिम छ । तर, तराईमा पहाडको तुलनामा जोखिम भने कम छ । तराईमा डुबान र बाढीको समस्या भने बर्षौदेखि नै यथावत छ । नदी किनारको तटीय क्षेत्रमा वस्नेहरू बाढीको जोखिममा पर्दै आएका छन् । उता वर्षा सुरु हुनासाथ उत्तरतिर आँखा लगाउँदै बाढीको प्रतिक्षामा बस्नुपर्ने बाध्यता तटीय क्षेत्रका जनताका लागि पीडाको विषय बन्दै आएको छ । त्यसमाथि अव्यवस्थित वस्तीका कारण समस्या उत्पन्न हुने गरेको छ । पहिले सानो सानो खोला बग्ने जमिनमा अहिले महल ठडिएका छन् । जसका कारण प्राकृतिक प्रकोपको जोखिम बढ्दै गएको छ ।

उता पहाडी भेगमा पनि विगतमा भन्दा धेरै पहिरो जान थालेको छ । यो गंभीर चुनौतिको विषय हो । अबको दिनमा सम्भावित जोखिमबाट बच्नेतर्फ समयमै सचेतना अपनाउनु पर्ने आवश्यकतामा जोड दिनु अत्यावश्यक भैसकेको छ । अबको केही दिन भारी वर्षाको चेतावनी दिइएकोले नदी किनारका जोखिम क्षेत्रका बासिन्दालाई अन्यत्र सार्नुपर्ने अवस्था आउन सक्छ । पछिल्लो पटक रसुवाको बाढीबाट प्रभावित परिवारलाई राहत र उद्धारको खाँचो छ । मृतक परिवारलाई उचित क्षतिपूर्ति दिने कुरामा सरकारको ध्यान जाओस् । नेपाली जनता हरेक वर्ष प्राकृतिक प्रकोपमा परेर पीडामा बस्नु परिरहेको अवस्थामा मंगलबारदेखि सुरु भएको भारी वर्षाको प्रभावबाट जोगिनेतर्फ प्रभावित क्षेत्रका जनता पनि सचेत बन्नु जरुरी छ । यो वर्ष बाढी पहिरो र डुबानका कारण बिपदमा परेका प्रभावितहरूलाई सरकारले राहत वितरणमा कञ्जुस्याई नगरोस् ।