काठमाडौँ ।
नेपाली सेनाबाट बर्खास्त गरिएका उपरथी प्रेम शाहीले जंगी अड्डाविरुद्ध सर्वोच्च अदालतमा दायर गरेका सबै रिट निवेदन फिर्ता लिएका छन्। मंगलबार उनले निवेदन फिर्ता गर्न नयाँ निवेदन दिएपछि, बुधबार न्यायाधीश शारङ्गा सुवेदी र शान्तिसिंह थापाको संयुक्त इजलासले निवेदन फिर्ता हुने आदेश दिएको हो।
शाही २०७७ पुस ८ गते पहिलोपटक जन्ममिति विवादमा र २०७९ पुस ६ गते अवकासको पत्र बदरको मागसहित दोस्रोपटक सर्वोच्च अदालत गएका थिए। उनका दुवै रिट निवेदनमा अझै अन्तिम फैसला भइसकेको थिएन।
शाहीको उमेर विवादबाट सुरु भएको प्रकरण पछि आर्थिक अनियमितताको आरोपमा पुगेर बर्खास्तीमा टुंगिएको थियो। उनका शैक्षिक प्रमाणपत्रमा जन्म मिति २०२२ पुस २० र नागरिकतामा २०२३ पुस २२ उल्लेख थियो। सेनाले शैक्षिक प्रमाणपत्रमा आधारित २०२२ को जन्म मिति मान्दै उनलाई २०७९ पुस ४ गते ५८ वर्षे सेवा उमेर पूरा भएको भन्दै अवकास दिएको थियो।
सर्वोच्चले भने उनलाई नागरिकताको आधारमा सेवामा कायम राख्न अन्तरिम आदेश दिएको थियो। तर, सो आदेश लिएर जंगी अड्डा पुगेका शाही सैनिक प्रहरीद्वारा पक्राउ परेका थिए। पछि उनलाई आर्थिक अनियमितताको आरोपमा सैनिक विशेष अदालतले दोषी ठहर गर्दै २०७९ फागुन १८ गते बर्खास्त गर्ने फैसला सुनाएको थियो।
उक्त फैसलामा उनलाई भविष्यमा सरकारी सेवामा अयोग्य नहुने व्यवस्था गरिएको थियो। सेनाबाट आधिकारिक रूपमा बर्खास्त भइसकेपछि पनि सर्वोच्चमा विचाराधीन रहेका दुवै निवेदन अब शाहीको स्वेच्छाले फिर्ता लिइएका छन्।
