खोज

बुटवल, २५ असार । बुटवलमा एक महिला सामूहिक बलात्कारमा परेकी छिन । बुटवल उपमहानगरपालिका–५, राधाकृष्ण मन्दिर नजिक साई मन्दिर परिसरमा बस्दै आएकी एक ४० वर्षिय महिलामाथि शनिबार राति सामुहिक बलात्कार भएको हो । आईतबार बिहान कालिका मन्दिर नजिक अचेत अवस्थामा रहेकी महिलालाई स्थानियले देखेपछि प्रहरीलाई खबर गरेका थिए । लगत्तै उनको लुम्बिनी प्रादेशिक अस्पतालमा जाच गरेपछि बलात्कारको घटना बाहिर आएको हो ।

शारीरिक र मानसिक पिडामा रहेकी महिलाको स्वास्थ्य अवस्था प्रति प्रहरीप्रशासन गम्भीर नदेखिएको स्थानिय बासिन्दाको गुनासो छ । चार दिन बितिसक्दा पनि दोषी पक्राउ नपरेको र पिडितको उपचारमा लापरवाही भएको एक स्थानियको आरोप लगाए । रात्रीकालिन बजारको अवधारणा सहित उज्यालो बुटवलको नारा चलाईरहदा घटेको यो घटनाले सुरक्षा संवेदशिलताप्रति सरोकारवालाहरुको भुमिकालाई प्रष्टाएको छ । स्थानीय समाजसेवीहरूले पीडित महिलालाई न्याय दिलाउन र दोषीलाई कडा कारबाही गर्न माग गरेका छन् ।

इलाका प्रहरी कार्यालय बुटवलका प्रहरी नायव निरीक्षक इन्द्र बहादुर रानाले घटनाको पुष्टि गर्दै हाल अनुसन्धान प्रक्रिया अघि बढाइएको जानकारी दिए । “सामूहिक बलात्कार आरोपमा संलग्नहरू पहिचान गर्न हामी अनुसन्धानमा छौं,”– रानाले संक्षिप्त प्रतिक्रिया दिए । घटना घटेको क्षेत्रमा सिसिटिभी फुटेज हेर्ने र आवश्यक अनुसन्धान जारी रहेको उनले बताए ।

यता अधिकारीकर्मी रिमा बिसीले बलात्कारजस्तो गम्भिर प्रकृतिको घटना हुनुले यहाको सुरक्षा ब्यवस्थामा कमजोरी देखिएको बताईन । दोषी तत्काल पक्राउ गरेर प्रहरीले सार्वजनिक गर्नुपर्ने उनको माग छ । घटनाबारे प्रहरीले जानकारी पाउनै बित्तिकै आवश्यक कानुनी प्रक्रिया शुरु हुने उनको तर्क छ । लैंगिक हिंसा, घरेलु हिंसा, यौनजन्य हिंसा, बाल हिंसा तथा मानव बेचबिखन लगायतका पीडितहरूलाई एकै ठाउँबाट समन्वयात्मक रूपमा स्वास्थ्य, कानुनी, मनोवैज्ञानिक, आवासीय संरक्षण तथा सामाजिक पुनःस्थापना जस्ता आवश्यक सेवा दिने ओसिएमसी मार्फत सेवा दिईने उनले बताईन । पीडितको तत्काल उपचार, मेडिकल जाँच, फोरेंसिक रिपोर्टसंगै कानुनी सहायता, मनोवैज्ञानिक परामर्श जरुरी रहेको उनले बताईन ।