खोज

 काठमाडौं ।

राष्ट्रिय स्वतन्त्र पार्टी (रास्वपा) की सांसद सोबिता गौतमले प्रधानमन्त्री केपी शर्मा ओली सहभागी भएको स्पेनको कार्यक्रमको बाहनामा गएकाहरू नै नफर्किएको भन्दै गम्भीर आरोप लगाएकी छन्।

मंगलबार प्रतिनिधिसभाको बैठकमा बोल्दै सांसद गौतमले त्रिभुवन अन्तर्राष्ट्रिय विमानस्थलमा मात्रै होइन, विभिन्न अन्तर्राष्ट्रिय कार्यक्रममा सहभागी हुने नाउँमा नेपालीलाई विदेश लैजाने गिरोह सक्रिय रहेको उल्लेख गर्दै त्यसविरुद्ध उच्चस्तरीय छानबिन समिति गठन गर्न माग गरिन्।

प्रधानमन्त्री ओली गत १४ असारमा संयुक्त राष्ट्रसंघको ‘विकासको लागि वित्त’ सम्बन्धी चौथो अन्तर्राष्ट्रिय सम्मेलनमा सहभागी हुन स्पेन गएका थिए। सो भ्रमणमा प्रधानमन्त्रीसँगै गएको टोलीमा केही व्यक्तिहरू कार्यक्रममा सहभागी हुने भन्दै स्पेन गएका तर अझै नफर्किएको समाचार सार्वजनिक भएपछि सांसद गौतमले संसदमा चासो व्यक्त गरेकी हुन्।

“स्वयं प्रधानमन्त्री जानुभएको कार्यक्रममा पनि केही व्यक्ति नफर्किएको भन्ने खबर सार्वजनिक हुनु गम्भीर विषय हो,” उनले भनिन्, “यो विषय त्रिभुवन विमानस्थलमा सीमित छैन, नेपालीलाई लोभ प्रलोभनमा पारेर लैजाने गिरोहसँग जोडिएको छ।”

गौतमले हालै देखिएका यस्ता घटनाहरूमा भिजिट भिसाको दुरुपयोग हुँदै आएको उल्लेख गर्दै त्यसविरुद्ध आफ्नो पार्टी स्पष्ट रूपमा उभिएको बताइन्।

सरकारले यस्तो संवेदनशील विषयमा टालटुले समिति बनाएर गम्भीरतासँग नलिएको भन्दै असन्तोष पनि व्यक्त गरिन्। “सरकारले स्वार्थ बाझिने, अनुभवविहीन पात्रको नेतृत्वमा कनिष्ठ कर्मचारी राखेर बनाएको समिति स्वीकार्य छैन,” गौतमको भनाइ थियो। उनले यस विषयमा उच्चस्तरीय छानबिन समिति अनिवार्य रुपमा गठन हुनुपर्ने पार्टीको अडान रहेको पुनः दोहोराइन्।