खोज

 काठमाडौं ।

चालु आर्थिक वर्षको ११ महिनासम्म शोधनान्तर स्थिति ४ खर्ब ९१ अर्ब ४४ करोड रुपैयाँले बचतमा रहेको नेपाल राष्ट्र बैंकले जनाएको छ। यो अघिल्लो आवको सोही अवधिको तुलनामा ६५ अर्ब ७७ करोड रुपैयाँले बढी हो। गत वर्ष सोही अवधिमा शोधनान्तर ४ खर्ब २५ अर्ब ६७ करोडले बचतमा थियो।

शोधनान्तरमा आएको सुधारको प्रमुख कारण निर्यातमा भएको उल्लेखनीय वृद्धि, रेमिट्यान्स आप्रवाहमा देखिएको वृद्धिदर र सीमित आयात वृद्धि रहेको केन्द्रीय बैंकले जनाएको छ। चालु आवको ११ महिनामा आयात १३ प्रतिशतले मात्र बढेको छ भने निर्यात भने ७७.८ प्रतिशतले बढेको छ।

रेमिट्यान्स आप्रवाह पनि यो अवधिमा १५.५ प्रतिशतले वृद्धि भएको छ। यी कारणहरूले शोधनान्तर स्थितिमा सकारात्मक असर पारेका छन्।

अमेरिकी डलरमा हेर्दा, चालु आवको जेठसम्म शोधनान्तर स्थिति ३ अर्ब ६२ करोड डलरले बचतमा रहेको छ, जुन अघिल्लो वर्षको ३ अर्ब २० करोड डलरको तुलनामा उच्च हो।

यस्तै, चालु खाता पनि ३ खर्ब ७ अर्ब ३१ करोडले बचतमा रहेको छ, जुन अघिल्लो आवमा २ खर्बको बचतमा थियो। डलरमा हेर्दा यो वर्ष २ अर्ब २६ करोडले बचतमा रहेको चालु खाता अघिल्लो आवमा १ अर्ब ५१ करोड डलरले बचतमा थियो।

खुद पूँजीगत ट्रान्स्फर चालु आव जेठसम्म ८ अर्ब ९६ करोड पुगेको छ, जुन अघिल्लो वर्षको सोही अवधिमा ५ अर्ब ४६ करोड मात्र थियो।

प्रत्यक्ष वैदेशिक लगानी (इक्विटी मात्र) पनि उल्लेखनीय रुपमा वृद्धि भएको छ। यो आवको जेठसम्म ११ अर्ब ९ करोड लगानी भित्रिएको छ, जबकि अघिल्लो वर्ष सोही अवधिमा ८ अर्ब २४ करोड मात्र थियो।