खोज

बुटवल, २४ असार । चीन र नेपालको सिमाना हुँदै बग्ने नदीमा आएको आकस्मिक बाढीले ठूलो धनजनको क्षति पु¥याएको छ । चीन र नेपाललाई जोड्ने मितेरी पुल समेत बाढीले बगाएको पुष्टि भएको छ ।

उक्त बाढीले रसुवा भन्सार क्षेत्र टिमुरेमा भयावह असर पारेको छ । सयौं संख्यामा पार्क गरिएका ईभी गाडीहरू, कन्टेनरहरू र भन्सारका सामानहरू बगाइसकेको जनाइएको छ । चिनियाँ भूभागमा रहेका मालवाहक कन्टेनरहरू समेत डुबानमा परेका छन् । तल्लो तटिय भुभागमा बस्ने जन्ताको अबस्था भयाभह हुदै गएको छ ।

हिमताल फुटेका कारण रसुवाको टिमुरे क्षेत्रमा बाढी आएको आशंका गरिएको छ । जल तथा मौसम विभागले मंगलबार बिहान एक विज्ञप्ति जारी गर्दै प्रारम्भिक रुपमा चिनियाँ क्षेत्रमा वर्षाकै कारण बाढी आएको नदेखिएको जनाएको छ ।

बाढीले भन्सार यार्ड र नजिकैको हाइड्रोपावर क्षेत्रमा काम गरिरहेका केही व्यक्तिहरू पनि बगेको हुनसक्ने आशंका गरिएको छ ।

रसुवाको गोसाईंकुण्ड गाउँपालिका वडा नम्बर–२ स्थित रसुवागढीमा आएको बाढीका कारण अलपत्र परेका ९ जनाको नेपाली सेनाले उद्धार गरेको छ । गएराति नेपाल–चिन सिमानाको लेण्डे खोला हुँदै भोटेकोशीमा बहाव बढेपछि फसेका ९ जनालाई रसुवाको टिमुरे क्षेत्रबाट सकुशल उद्धार गरिएको सैनिक जनसम्पर्क तथा सूचना निर्देशनालयले जनाएको छ ।

रसुवामा उद्धारको लागी एनए–०३८ एमआई र इकुरेल हेलिकप्टर परिचालन गरिएको सेनाले जनाएको छ । नुवाकोटको त्रिशूली नदीमा रुखमा बसेर ज्यान जोगाइरहेका २ जनालाई समेत सेनाको एमआई हेलिकप्टरले उद्धार गरेको छ ।

मौसमजन्य विपद्को जोखिमप्रति चासो व्यक्त गर्दै प्रधानमन्त्री केपी शर्मा ओलीले उद्धार तथा राहत कार्यका लागि सरकार उच्च सतर्कतामा रहेको बताएका छन् । विपद् व्यवस्थापन विभागलाई हाई एलर्टमा राखेको कुरा प्रधानमन्त्री ओलीले मंगलबार फेसबुकमार्फत जानकारी दिए ।