खोज

काठमाडौं ।

प्रधानमन्त्री केपी ओलीले अत्यावश्यक बाहेक निर्धारित कार्यक्रम स्थगित गरेका छन् । पूर्वनिर्धारित सबै कार्यक्रम स्थगित गरेर तिब्बतको सीमावर्ती क्षेत्रमा भएको भारी वर्षाका कारण त्रिशूली नदीमा आएको बाढीबाट प्रभावितलाई उद्धार गर्न सरकार युद्धस्तरमा लागेको उनले बताएका छन् ।

प्रधानमन्त्री आज एमालेको केन्द्रीय कृषि तथा पशुपन्छी विकास विभागद्वारा आयोजित नीति संवाद र नेपाल उद्योग परिसंघको २२औँ साधारण सभा सहभागी हुने कार्यक्रम तय भएको थियो । यी दुई कार्यक्रमम स्थगित गरेपछि प्रधानमन्त्री अहिले कांग्रेस सभापति शेरबहादुर देउवासहित शीर्ष तहको भेटमा व्यस्त छन् ।

उनले फेसबुकमा लेखेका छन्, ‘बाढीले केही नागरिकको ज्यान गएको र केही बेपत्ता भएका दुःखद खबरहरू आएका छन्। ठुलो भौतिक क्षति पुर्‍याएको छ। ज्यान गुमाउने नागरिकप्रति श्रद्धाञ्जली अर्पण गर्दछु र विपद्को पीडामा रहनु भएका नागरिकप्रति सहानुभूति प्रकट गर्दछु । यस दुःखद क्षणमा अत्यावश्यक बाहेक निर्धारित कार्यक्रमहरू स्थगित गरेर प्रभावित क्षेत्रमा भइरहेको उद्धार कार्यबारे सुरक्षा निकायसँग नियमित रिपोर्टिङ लिइरहेको छु ।’

विपद् सम्भावित क्षेत्रमा आपातकालीन सहायता उपलब्ध गराउन तीब्र समन्वय गरिएको र सरकारको तर्फबाट गरिने प्रयासमा कुनै कमी नहोस् भनेर निर्देशन दिइएको बताएका छन् । सरकारी निकायहरूले उद्धारको काम गरिरहेको भन्दै सहयोग अपेक्षा राखेका छन् ।