खोज

काठमाडौं ।

मंगलबार सेयर बजारमा धेरैजसो कम्पनीको मूल्य बढे पनि नेप्से परिसूचक सामान्य मात्रामा घटेको छ। आज १३३ कम्पनीको सेयर मूल्य बढेको छ भने ११५ कम्पनीको मूल्य घटेको छ। घट्ने कम्पनीहरूको पूँजीकरण उच्च भएकाले समग्रमा नेप्से परिसूचकमा ०.१४ अंकको गिरावट आएको हो। यो गिरावटपछि नेप्से २६८३.८६ विन्दुमा झरेको छ।

आजको कारोबार रकममा उल्लेखनीय कमी देखिएको छ। अघिल्लो दिन ८ अर्ब ३७ करोड रुपैयाँको कारोबार भए पनि मंगलबार ६ अर्ब ५७ करोड रुपैयाँमा सिमित भएको छ।

समूहगत रूपमा हेर्दा फाइनान्स समूह सबैभन्दा बढी १.२५ प्रतिशतले बढेको छ। विकास बैंक ०.४१, हाइड्रोपावर ०.५९, लगानी ०.०८, उत्पादन तथा प्रशोधन ०.३७, माइक्रोफाइनान्स ०.०७ र व्यापार समूह ०.३८ प्रतिशतले बढेका छन्। यद्यपि बैंकिङ ०.३७, होटल तथा पर्यटन ०.०१, अन्य ०.७७ र निर्जीवन बीमा समूह ०.३७ प्रतिशतले घटेका छन्, भने जीवन बीमा समूह स्थिर रह्यो।

सेयर मूल्य सर्वाधिक बढ्ने कम्पनीमा बुटवल पावर अग्रस्थानमा रह्यो, जसको मूल्य ८.२१ प्रतिशतले उकालो लागेको छ। त्यस्तै, पिपुल्स हाइड्रोपावर ५.९६, रिभर फल्स पावर ४.६९, ग्रिन डेभलपमेन्ट बैंक ४.६२ र सयपत्री हाइड्रोपावर ४.०७ प्रतिशतले बढेका छन्।

दोस्रो पक्षमा, सबैभन्दा धेरै घट्ने कम्पनी रसुवागढी हाइड्रोपावर रह्यो, जसको मूल्य ५.०८ प्रतिशतले घट्यो। मंगलबार बिहान आएको बाढीका कारण १११ मेगावाट क्षमताको रसुवागढी जलविद्युत् आयोजना प्रभावित भएको र विद्युत् आपूर्ति बन्द भएपछि सो कम्पनीको सेयर मूल्यमा नकारात्मक प्रभाव परेको हो। अन्य घट्ने कम्पनीमा भूगोल इनर्जी ३.९२ र माथिल्लो मैलुङखोला ३.१४ प्रतिशतले घटेका छन्।

कारोबारको आधारमा नेपाल पुनर्बीमा, बुटवल पावर, गार्डियन माइक्रोलाइफ इन्स्योरेन्स, लक्ष्मी सनराइज बैंक (संस्थापक सेयर) र राधि विद्युत् प्रमुख रूपमा अगाडि देखिएका छन्।