खोज

 काठमाडौं ।

नेपाली कांग्रेसकी सांसद प्रतिमा गौतमले जापानको भिसा प्राप्त गरिसकेका नेपाली प्रशिक्षार्थी कामदारहरूलाई अनाधिकृत भाषा परीक्षा दिन बाध्य बनाइएको भन्दै संसदमा आपत्ति जनाएकी छिन्।

मंगलबारको प्रतिनिधिसभा बैठकमा बोल्दै उनले ‘जान’ नामक संस्थामार्फत विगत १५ वर्षदेखि चलिरहेको सिन्डिकेटप्रति सरकारको ध्यानाकर्षण गराइन्। उनका अनुसार भिसा तथा पाइसकेका युवालाई पनि अनावश्यक रूपमा दोहोरो भाषा परीक्षा दिन बाध्य बनाइएको छ।

“भाषा पास गरेर सीओई पाइसकेकालाई अनावश्यक परीक्षा दिन बाध्य पारिएको छ। ती युवाहरू अहिले हतास, निराश र आक्रोशित छन्,” उनले भनिन्, “हजारौँ युवाको रोजगार सपना यसरी भत्किँदै गएको छ, तर सरकार चुपचाप छ।”

गौतमले यो विषयमा वैदेशिक रोजगार व्यवसायी, उपभोक्ता अधिकारकर्मी र मिडियाले पटक–पटक सरकारको ध्यानाकर्षण गराएको भए पनि सरकारले कुनै सुनुवाइ नगरेको आरोप लगाइन्। अन्ततः मानव अधिकारकर्मीहरूले मुद्दा सर्वोच्च अदालतमा दायर गरेपछि मात्र यसमा केही गति आएको उनको भनाइ थियो।

सांसद गौतमका अनुसार सर्वोच्च अदालतले कारण देखाऊ आदेश जारी गरिसकेको छ र असार १६ गते अन्तरिम आदेशका लागि दुवै पक्षलाई बोलाइएको छ।

उनले सरकारसँग यस्तो अनियमिततालाई तत्काल अन्त्य गरी, युवाहरूको आत्मबल, रोजगारी सपना र निष्पक्ष प्रक्रियामा संरक्षण दिनु पर्ने माग गरिन्।