खोज

कपिलवस्तु, २४ असार  ।

मलेसियामा सम्पन्न एसीसी यू–१६ इस्ट जोन कप क्रिकेटमा नेपाललाई उपाधि जिताउन महत्त्वपूर्ण भूमिका खेलेका कपिलवस्तुका खेलाडी रौनक श्री वास्तवलाई कपिलवस्तुमा स्वागत तथा नगर परिक्रमा गराइएको छ ।

कपिलवस्तु क्रिकेट सङ्घको आयोजनामा रौनकलाई तौलिहवाको जमुवार पुल देखी प्रशासन चौक, आन्दोलन चोक, गौढी चोक, भिक्षु चोक, महिता हुँदै तिलौराकोट होटलमा पुर्‍याएर स्वागत तथा सम्मान गरिएको हो । एसीसी यू–१६ इस्ट जोन कपको विजेता टोली नेपालका ब्याटर रौनक श्रीवास्तव प्रतियोगिताको सर्वोत्कृष्ट खेलाडी घोषित भएका थिए ।

कृष्णनगर नगरपालिका–१ मडहाका ब्याटर रौनकले मलेसियामा सम्पन्न एसियन क्रिकेट काउन्सिल (एसीसी) १६ वर्षमुनिको इस्ट जोन कप क्रिकेटमा एक शतक र एक अर्धशतकसहित २९६ रन बनाएका थिए । सो सगै उनको राष्ट्रिय र अन्तरराष्ट्रियस्तरमा चर्चा चुलिएको छ ।

तौलिहवामा आयोजित कार्यक्रममा कपिलवस्तु क्रिकेट संघका अध्यक्ष प्रकाश गैरे सहितको कार्य समिति, प्रदेशसभा सदस्य सुधाकर पाण्डेय, कपिलवस्तु नगरपालिकाका प्रमुख सुदिप पौडेल, प्रमुख जिल्ला अधिकारी दिल कुमार तामाङ, प्रहरी उपरिक्षक निरन्जनदत्त भट्ट, नेपाल क्रिकेट संघ (क्यान) पुर्व सचिव प्रशान्त बिक्रम मल्ल, क्यान लुम्बिनी प्रदेश सचिव कैलाश रोक्का मगर, सदस्यहरु बिनय सिंह ज्ञवाली, माया ज्ञवाली, प्रदेश सल्लाहकार दिनेश हमाल लगायतले खेलाडी रौनक श्री वास्तवलाई स्वागत तथा सम्मान गरेका थिए ।

सो अवसरमा बोल्दै कपिलवस्तु क्रिकेट संघका अध्यक्ष प्रकाश गैरेले मलेसियामा सम्पन्न प्रतियोगिताको टुर्नामेन्ट भरी राम्रो प्रदर्शन गरेकोले नेपाललाई बिजेता बनाउदै उत्कृष्ट खेलाडी घोषित भएकोमा साह्रैं खुसी लागेको बताए । रौनकको प्रदर्शन जिल्लाको लागि मात्रै नभई मुलुककै लागी गर्वको बिषय भएको उनले बताए ।

आफ्नो गृह जिल्लामा आफुलाई दिईएको माया, स्वागत तथा सम्मानले थप जिम्मेवारीको अनुभुती गराउनुका साथै धेरै नै खुसी लागेको खेलाडी रौनकले बताए ।