खोज

 विराटनगर।

कोशी प्रदेशसभाले ‘केही प्रदेश ऐनलाई संशोधन गर्न बनेको विधेयक, २०८२’ सोमबार सर्वसम्मत रूपमा पारित गरेको छ। आन्तरिक मामिला तथा कानुनमन्त्री रेवतीरमण भण्डारीले पेश गरेको विधेयक कुनै संशोधन प्रस्ताव नआएको र दफावार छलफलमा पनि कसैले भाग नलिएपछि सभामुख अम्बरबहादुर विष्टले निर्णयार्थ प्रस्तुत गर्दै पारित गरिएको हो।

त्यसैगरी, मुख्यमन्त्री हिक्मतकुमार कार्कीका तर्फबाट ‘महालेखा परीक्षकको सातौँ वार्षिक प्रतिवेदन, २०८२’ पनि सभामा पेश गरियो।

सभाको शून्य समयमा बोल्दै एमाले सांसद रमेशकुमार बस्नेतले बिपी कोइराला स्वास्थ्य विज्ञान प्रतिष्ठानलाई राजनीतिक प्रभावबाट मुक्त राख्नुपर्ने बताएका छन्। उनले वर्षेनी लाखौं नागरिकले सेवा लिने प्रतिष्ठान नेपाल–भारतकै नमूनायोग्य स्वास्थ्य संस्था भएको उल्लेख गर्दै यसलाई विवादरहित बनाइ राख्न जोड दिए।

निजामती कर्मचारी ऐनमा कुलिङ पिरियडको त्रुटिका विषयमा कसैले जिम्मेवारी नलिनु अस्वाभाविक भएको टिप्पणी गर्दै उनले गल्ती गर्नेहरूलाई कारबाही गर्न माग गरे।

सांसद राजन किरातीले पर्यटन, वन तथा वातावरणमन्त्री सदानन्द मण्डलले कर्मचारीसँग सरुवाको नाममा रकम मागेको भन्दै सामाजिक सञ्जालमा आएको समाचारप्रति सरकार गम्भीर हुनुपर्ने धारणा राखे।

सांसदहरू गोपालबहादुर बस्नेत, किशोरचन्द्र दुलाल, शोभा चेम्जोङ र ललिताकुमारी चौधरीले पनि विभिन्न समसामयिक विषयमा धारणा राखे। प्रदेशसभाको अर्को बैठक भोलि बिहान ११ बजेका लागि तय गरिएको छ।