काठमाडौं ।
काठमाडौं महानगरपालिकाका प्रमुख प्रशासकीय अधिकृत सरोज गुरागाईंले आफूविरुद्ध गरिएको चरित्र हत्या प्रयासप्रति गम्भीर आपत्ति जनाएका छन्।
आइतबार केही सञ्चारकर्मीहरूसँग कुरा गर्दै गुरागाईंले काठमाडौं टावरको नक्सा पासको विषयलाई लिएर आफूमाथि लगाइएको आरोपमा कुनै सत्यता नरहेको दाबी गरे। उनले आफू उपस्थित नरहेको अवस्थामा समेत आफ्नो नाम जोडेर गलत प्रचार गरिएको भन्दै त्यसले चरित्र हत्या भएको उल्लेख गरे।
“व्यक्ति तोकेर तँ भ्रष्टाचारी हो भनेर त्यसरी तोक्न मिल्ला? त्यो त आधिकारिक निकायले भन्नुपर्ने कुरा हो,” भन्दै गुरागाईंले प्रमाणविना कसैलाई दोषी करार गर्नु अनुचित भएको बताए।
उनले आफूले मेयरविरुद्ध कहिल्यै केही नबोलेको उल्लेख गर्दै मेयरको सचिवालयबाटै आफूमाथि आरोप आइरहेकोप्रति असन्तुष्टि जनाए। “मलाई भ्रष्टाचारी भन्नेलाई आधिकारिक निकाय हुनुपर्छ, न कि मेयरको सचिवालय,” उनले भने।
गुरागाईंले आफ्नो छानबिन भइरहेको भए पनि त्यसको निष्कर्ष आउनु अघि नै सार्वजनिक रूपमा बदनाम गर्न खोजिएकोप्रति गुनासो गर्दै निष्पक्ष मूल्यांकनको अपेक्षा राखे।
उनका अनुसार काठमाडौं टावरको विषयलाई लिएर लामो समयदेखि कुनै बैठकसमेत नबसेको र नक्सा पाससम्बन्धी निर्णय प्रक्रियामा आफू नसंलग्न रहेको स्पष्ट पारे। गुरागाईंको यो भनाइ पछिल्लो समय काठमाडौं टावर र महानगरभित्र देखिएको आन्तरिक विवादको पृष्ठभूमिमा आएको हो।
