खोज

काठमाडौं।

नेपाली कांग्रेसका केन्द्रीय नेता डा. मिनेन्द्र रिजालले पार्टीको महाधिवेशन दुई चरणमा गर्नुपर्ने प्रस्ताव अघि सारेका छन्। सोमबारदेखि पार्टी केन्द्रीय कार्यालय सानेपामा सुरु भएको केन्द्रीय समिति बैठकमा आइतबार बोल्दै उनले महाधिवेशन प्रतिनिधिको निर्वाचन अलगै चरणमा गरिनु उचित हुने धारणा राखेका हुन्।

उनले भने, “पहिलो चरणमा महाधिवेशन प्रतिनिधिको मात्रै निर्वाचन गरौं, र ती प्रतिनिधिबाट सभापति निर्वाचन गरौं।” रिजालका अनुसार यस्तो प्रक्रिया अपनाउँदा पार्टीको तल्लो तहसम्म गुटबन्दी फैलिन पाउँदैन र संगठन बलियो बन्नेछ।

उनले महाधिवेशन प्रतिनिधिको निर्वाचन आम निर्वाचन अगाडि सम्पन्न गर्नुपर्ने सुझाव पनि दिए। “त्यो बाटो नलिए झगडा–झगडामै पार्टी कमजोर भएर निर्वाचनमा नोक्सान हुनेछ,” उनले स्पष्ट पारे।

डा. रिजालले सभापति निर्वाचित भए पनि त्यसको कार्यकाल आम निर्वाचनपछि मात्रै सुरु गर्ने विधान व्यवस्था गर्नुपर्ने बताएका छन्। त्यतिञ्जेलसम्म नव निर्वाचित सभापतिले पार्टीलाई कुन स्वरूपमा लैजाने, कति तह बनाउने, कस्ता निर्वाचन प्रक्रिया अवलम्बन गर्ने भन्नेबारे स्पष्ट खाका तयार गर्ने जिम्मेवारी हुने उनले उल्लेख गरे।

उनको प्रस्तावमा केन्द्रका पदाधिकारी, केन्द्रीय सदस्य, प्रदेश समिति र मातहतका समितिहरूको निर्वाचन आम निर्वाचनपछि गरिनुपर्ने उल्लेख छ। पार्टीमा संगठनात्मक स्पष्टता, गुट न्यूनीकरण र दीर्घकालीन रणनीति तय गर्न यस्ता परिवर्तन आवश्यक रहेको उनको तर्क छ।