खोज

बुटवल, २२ असार । रुपन्देहीस्थित शहीद श्री गंगालाल पुस्तकालयको ३८औं साधारण सभा तथा आठौं अधिवेशनबाट चुडामणी खरेलको अध्यक्षतामा नयाँ ९ सदस्यीय कार्यसमिति सर्वसम्मत चयन भएको छ । समितिको उपाध्यक्षमा बाबुराम अधिकारी, सचिवमा लक्ष्मण ज्ञवाली, कोषाध्यक्षमा मणिराम भट्टराई तथा सदस्यहरूमा टिकानिधि गौतम, केशवराज न्यौपाने, गोपालमणि गौतम र पुस्करनाथ पन्थ चयन भएका छन् । बाँकी एक सदस्य कार्यसमितिबाट मनोनयन गरिने निर्वाचन समिति संयोजक डा.लक्ष्मण घिमिरेले जानकारी दिए ।

कार्यक्रमको संस्थापक उपाध्यक्ष तथा पूर्व राष्ट्रिय सभासदस्य देवेन्द्र घिमिरेले उद्घाटन गर्दै प्रविधिको विकाससँगै नयाँ पुस्तामा घट्दै गएको पढ्ने बानीप्रति चिन्ता व्यक्त गरे । पठन संस्कृतिको पुनर्जागरण जरुरी रहेको भन्दै उनले पुस्तकालयलाई समयसापेक्ष योजनासहित अघि बढाउन सुझाव दिए ।

कार्यक्रममा वडाध्यक्ष फर्सुराम गिरीले शहीद गंगालाल पुस्तकालयलाई ऐतिहासिक धरोहरका रूपमा अगाडि बढाउन आफूले सक्दो सहयोग गर्ने प्रतिबद्धता जनाए ।

नवनिर्वाचित अध्यक्ष चुडामणी खरेलले पुस्तकालयलाई “राष्ट्रकै गौरवको केन्द्र” बनाउने लक्ष्यसहित सबैको साथमा अघि बढ्ने प्रतिवद्धता व्यक्त गरे ।
कार्यक्रममा संस्थापक सदस्य मदनलाल पौड्याल, देवीप्रसाद पाण्डे, विभिन्न उपभोक्ता समिति तथा वन अनुसन्धान केन्द्रका प्रतिनिधिहरू, आजीवन सदस्यलगायतले शुभकामना व्यक्त गरेका थिए ।
यस अवसरमा लक्ष्मण ज्ञवालीद्वारा प्रस्तावित पुस्तकालयको पुनर्लिखित विधान २०५५ पारित गरिएको संचालक सदस्य केशवराज न्यौपानेले जानकारी दिए । कार्यक्रममा अध्यक्ष खरेलले गतिविधि प्रतिवेदन र कोषाध्यक्ष मणिराम भट्टराईले आर्थिक प्रतिवेदन प्रस्तुत गरेका थिए ।

शहीद गंगालाल पुस्तकालयले पठन संस्कृति विकास र सामाजिक चेतनाको अभिवृद्धिमा योगदान दिंदै आएको छ । नयाँ कार्यसमितिबाट पुस्तकालयको दिगो विकासमा थप गति आउने अपेक्षा गरिएको छ ।