खोज

पाल्पा, २२ असार ।

राप्ती गाउँपालिका दाङ र तानसेन नगरपालिका पाल्पाबिच असल अभ्यास आदान–प्रदान कार्यक्रम सफलतापूर्वक सम्पन्न भएको छ । स्थानीय शासनमा राम्रो अभ्यासका नमुनाहरू साझा गर्ने उद्देश्यले सम्पन्न कार्यक्रममा दुबै पक्षका जनप्रतिनिधि तथा कर्मचारीहरूको सक्रिय सहभागिता रहेको थियो।

कार्यक्रमका क्रममा राप्ती गाउँपालिकाको प्रतिनिधिमण्डलले तानसेन नगरपालिकाको सेवा प्रवाह, सुशासन अभ्यास, योजना व्यवस्थापन, बजेट कार्यान्वयन प्रक्रिया, सूचना प्रविधिको प्रयोग र जनसहभागिता अभिवृद्धिका प्रयासहरूबारे प्रत्यक्ष अवलोकन गरेको थियो । साथै, दुबै निकायबिच अनुभव साटासाट, कार्यपद्धति तुलना र भावी सहकार्यको सम्भावनाबारे पनि छलफल गरिएको तानसेन नगरपालिका प्रमुख सन्तोशलाल श्रेष्ठले बताए ।

तानसेन नगरपालिकाका उप प्रमुख प्रतीक्षा गाहा, प्रवक्ता यादव सिह कार्की, प्रशासकीय अधिकृत, योजना शाखा प्रमुख, सूचना अधिकारीलगायतका पदाधिकारीहरूले नगरपालिकाको प्रमुख अभ्यासहरू प्रस्तुत गर्दै, पारदर्शी र प्रभावकारी स्थानीय शासनमा अपनाइएका उपायहरूबारे जानकारी गराएका थिए।

कार्यक्रमको अन्त्यमा दुवै पक्षले एकअर्काको उत्कृष्ट अभ्यासको सम्मान गर्दै मायाको चिनो आदानप्रदान गरेका थिए।

स्थानीय तहहरूबिच यस्ता सकारात्मक अभ्यास साटासाट कार्यक्रमहरू सुशासन, पारदर्शीता र सेवा प्रवाहमा अझ सुधार ल्याउन सहयोग पुग्ने प्रमुख प्रशासकीय अधिकृत पिताम्बर पाण्डेले बताए ।