वीरगन्ज ।
सर्लाहीका प्रहरी प्रमुख (एसपी) योगेन्द्रकुमार खड्कालाई अपशब्द प्रयोग गरेका जनता समाजवादी पार्टी (जसपा) मधेस प्रदेश अध्यक्ष अशोक कुमार यादव फरार भएका छन्।
मधेस प्रदेश प्रहरी प्रमुख डीआईजी उमाप्रसाद चतुर्वेदीका अनुसार, यादवविरुद्ध जिल्ला अदालतबाट पक्राउ पुर्जी जारी भएपछि खोजी कार्य तीव्र पारिएको छ। प्रारम्भिक सूचनाअनुसार यादव भारततर्फ भागिसकेको आशंका गरिएको छ।
डीआईजी चतुर्वेदीले भने, “हामी विभिन्न ठाउँमा सर्च अभियान चलाइरहेका छौं, उनी चाँडै प्रहरी नियन्त्रणमा आउनेछन्।” यादवलाई पक्राउ गर्न विशेष प्रहरी टोली परिचालन गरिएको छ।
यादवमाथि सार्वजनिक सेवामा रोकावट र उपद्रव कसुर अन्तर्गत दुई वटा मुद्दामा अदालतले पक्राउ आदेश दिएको हो।
बिहीबार राति एसपी खड्का र नेता यादवबीच भएको गालीगलौजपूर्ण टेलिफोन संवाद सामाजिक सञ्जालमा भाइरल भएपछि घटनाले राजनीतिक र कानुनी तिव्रता लिएको हो।
