खोज

बुटवल, २१ असार ।

अर्घाखाँचीको भूमिकास्थान नगरपालिकाले आ.व.२०८१/०८२ मा ८६ करोड ८८ लाख ४७ हजारको बजेट ल्याएकोमा हालसम्म कुल बजेटको ८६.६ प्रतिशत खर्च गरेको छ । चालुतर्फ ८२ प्रतिशत खर्च गरेको भूमिकास्थानले पुँजीगततर्फ ८१ प्रतिशत खर्च गरेको जनाएको छ । यस्तै भूमिकास्थानले आ.व. २०८१/०८२ मा ८१ लाख ३० हजार रुपैयाँ राजस्व सङ्कलन गरेको छ । ८२ लाख राजश्व सङ्कलन गर्ने लक्ष्य राखेको भूमिकास्थानले असार १९ गते सम्म ८१ लाख बढी राजश्व उठाउन सफल भएको नगरपालिकाले असार मसान्तसम्म लक्ष्यभन्दा बढी आन्तरिक आम्दानी हुने सङ्केत देखिएको समेत जनाएको छ ।

कर्मशील जनशक्ति परिचालन कार्यक्रम मार्फत बाँझो जग्गामा खेती गर्नु, मकैको पोष्कर र थाकलको पातबाट टोपी र झोला बनाएर बजारीकरण गर्नु, रोजगारी प्रदान गर्नु, रैथाने बाली प्रबद्र्धनमा लाग्नु, बिउमा आत्मनिर्भर बन्नु, भौतिक विकास संगै सामाजिक विकासलाई अगाडि बढाउनुलाई भूमिकास्थान नगरपालिकाले आफ्नो प्रगति मानेको छ ।

नगरप्रमुख झविलाल थापाका अनुसार उत्पादन, उद्यम र शतकर्म मार्फत भूमिकास्थानलाई समृद्ध बनाउने अभियान जारी राखेको छ । “भूमिकास्थानले कर्मशील जनशक्ति परिचालन मार्फत उत्पादन र रोजगारी सिर्जना गरेको छ ।” नगरप्रमुख थापाले भन्नुभयो, “सुन्दा सामान्य लागे पनि यसले नगरपालिकाको बसाइसराई समेत कम गर्ने विश्वास लिएका छौं ।”

कर्मशील जनशक्ति परिचालन कार्यक्रम मार्फत यस वर्ष २ सय क्विन्टल प्याज उत्पादन गरेको नगरपालिकाले ढाकावाङ्गको खाकाबेशीमा गरेको लोकल धान खेती गरेको, शिक्षा तर्फ पढ्दै कमाउँदै रमाउँदै विद्यालय कार्यक्रम सञ्चालन, अभिभावक शिक्षा सञ्चालन, शिक्षकको क्षमता विकासका कार्यक्रम सञ्चालन, स्वास्थ्यतर्फ जेष्ठनागरिक सहित लक्षित वर्गको सेवालाई केन्द्रित गरी घरदैलो अभियान चलाएको, घुम्ती शिविर मार्फत विशेषज्ञ सेवा दिएको, योग तथा ध्यान शिविर चलाएको लगायतका कार्यलाई भूमिकास्थानले प्रगतिको रूपमा लिएको छ । गाउँमा रहेका बाँझो जग्गामा खेती गर्दै रोजगारी सिर्जना गर्ने र कृषिमा आत्मनिर्भर बनाउने भूमिकास्थानको प्रमुख उद्देश्य रहेको छ ।