खोज

सल्यान, २१ असार ।

नयाँ आर्थिक वर्ष २०८२/०८३ को प्रारम्भदेखि सल्यानमा आधुनिक बसपार्क सञ्चालनमा आउनेभएको छ । शारदा नगरपालिकालेको प्रमुख व्यापारिक केन्द्र श्रीनगरमा निर्माण सम्पन्न भएको यो बसपार्कलाई औपचारिक सञ्चालनको तयारी थालिएको हो ।  श्रीनगर आधुनिक बसपार्क निर्माणमा हालसम्म पाँच करोड ६० लाख रुपैयाँ लगानी गरिएको जनाउँदै शारदा नगरपालिकाका प्रमुख प्रकाश भण्डारीले नयाँ आर्थिक वर्षको प्रारम्भदेखि नै बसपार्क औपचारिक रूपमा सञ्चालनमा ल्याउने तयारी रहेको जनाए ।

आर्थिक वर्ष २०८०/०८१ बाट निर्माण सुरु गरिएको यो बसपार्क करिब सात हजार वर्ग मिटर क्षेत्र सरकारी प्रति ऐलानीमा फैलिएको छ । बसपार्क क्षेत्रमा दुई वटा १७–१७ कोठाका व्यापारिक महल तयार भइसकेका छन् । जस अन्तर्गत ३५ वटा व्यापारिक स्टल र ३४ वटा छुट्टाछुट्टै सटर रहेका छन् । व्यापारिक भवन सँगै सार्वजनिक शौचालय, गेट, पार्किङ, फुटपाथ, नाला लगायतका संरचना तयार गरिएको नगरपालिकाका इन्जिनियर खकेन्द्र मल्लले जानकारी दिए ।

नगरपालिकाको दीर्घकालीन योजनाको रूपमा रहेको आधुनिक बसपार्क नेपाल सरकार, कर्णाली प्रदेश सरकारसँगको साझेदारीमा नगरपालिकाले निर्माण गरेको प्रशासकीय अधिकृत ओम प्रकाश देवकोटाले बताए । यसलाई दीर्घकालीन आम्दानीको स्रोतका रूपमा विकास गर्ने योजना बनाएको प्रमुख उनको भनाई छ । “व्यापारिक सटर, स्टल र महलहरू भाडामा दिएर नियमित आम्दानी लिन सकिन्छ । यसबाट उठ्ने राजस्व नगरको अन्य विकास योजनामा लगानी गर्न सकिन्छ,” देवकोटाले भने ।

जिल्लाकै व्यस्त बजारको रूपमा रहेको श्रीनगर बजार क्षेत्रको अव्यवस्थित पार्किङको व्यवस्थापनमा सघाउ पुग्ने साथै व्यापार, व्यवसायमा समेत टेवा पुग्ने नगर प्रमुख भण्डारीको अपेक्षा छ । उनले भने, “नगरलाई आर्थिक आम्दानीको स्रोत सृजनाका लागि पनि बसपार्कले मद्दत गर्नेछ । सवारीसाधन र आर्थिक रूपमा चलायमान बनाउन यसले भूमिका खेल्नेछ ।” बसपार्क बनाउने क्रममा जग्गा खाली गराउँदा विस्थापित भएका व्यवसायीलाई पहिलो प्राथमिकतामा राखेर स्टल वितरण गर्ने योजना रहेको नगरपालिकाका उपप्रमुख सुस्मिता सापकोटा सुनारले बताइन् ।

आधुनिक बसपार्कले यातायात व्यवसायमा ठुलो परिवर्तन ल्याउने सल्यान रुकुम यातायात प्रालिका अध्यक्ष अरविन्द कुमार राईको अपेक्षा छ । यद्यपि उनले बसपार्क निर्माण गरेर मात्र नहुने भन्दै यसको दिगोपना, सुरक्षा, नियमित सरसफाइ जस्ता कुरामा ध्यान दिनुपर्ने धारणा व्यक्त गरे । गाडी, यात्रु र सामानको सुरक्षा, उचित व्यवस्थापनका लागि नगर प्रहरी सँगै अन्य राज्यका सुरक्षा निकायसँग प्रभावकारी समन्वयको खाँचो औँल्याए ।

यस्तै शारदा यातायात प्रालिका उपाध्यक्ष कर्ण बहादुर बस्नेतले बसपार्क सञ्चालन गरेर त्यहीँ भित्रबाट नै सम्पूर्ण गाडीहरू छुट्ने व्यवस्था मिलाउनुपर्ने बताए । आधुनिक बसपार्कको निर्माणले यातायात सेवामा गुणात्मक सुधार ल्याउन अपेक्षा सहित बस्नेतले यात्रु तानातान कम हुने, बिच बाटो तथा बजारबाट गाडी चढ्ने र क्षमता भन्दा बढी यात्रु राख्ने जस्ता समस्या हल हुने विश्वास व्यक्त गरे ।

आधुनिक बसपार्कले श्रीनगरलाई सौन्दर्यीकरण सँगै थप व्यापारिक आकर्षण बढाउने स्थानीय व्यापारीहरूले जनाएका छन् । उनीहरूका अनुसार बसपार्कले यातायातको सहज व्यवस्थापन गर्दै व्यापार विस्तारका लागि नयाँ अवसरहरू सिर्जना गरेको छ । यात्रुहरूलाई पनि सहजता थपिने छ भने यातायातको गुणस्तरमा सुधार ल्याउने छ ।