खोज

नवलपरासी पश्चिम् ।

भूमि व्यवस्था सहकारी तथा गरिबी निवारण मन्त्री बलराम अधिकारीले बर्दघाटका भूमिहीनलाई पुर्जा वितरण गरेका छन् । बर्दघाट नगरपालिकाद्वारा आयोजित एक कार्यक्रमका बिच मन्त्री अधिकारीले बर्दघाट नगरपालिका वडा नम्बर ५ का भूमिहीनलाई लालपुर्जा वितरण गरेका हुन् ।

कार्यक्रममा बोल्दै मन्त्री अधिकारीले स्थानीय पालिकाहरू र जिल्ला भूमि आयोग बिच केही समन्वय अभाव देखिएको बताउँदै आयोग र स्थानीय तहका प्रतिनिधि बसेर एकीकृत छलफल गर्नु पर्ने उल्लेख गरे । मन्त्री अधिकारीले स्थानीय तहहरुले कृषि र आवास गरि जग्गा वर्गीकरण गर्ने कुरामा समेत समस्या उत्पन्न भएकाले त्यसलाई सुधार गर्नु पर्ने र स्थानीय तह हरुलाई सो अधिकार भएको उल्लेख गरे । पुर्जा वितरण कार्यलाई जस लिने भन्दा पनि गरेका कामको जनता आफैले मूल्यांकन गर्ने समेत उनले बताए ।

बर्दघाट नगरपालिकाका नगरप्रमुख शम्भुलाल श्रेष्ठले दोहोरो दर्ता, अनियमित दर्ता लगायतका समस्याहरू देखा परेकाले त्यस तर्फ पनि सम्बन्धित निकाय लाग्नु पर्नेमा जोड दिए । भुमिहिन, दलित र अव्यवस्थित सुकुम्बासीहरुका निम्ति जग्गा नापजाँच गर्नका निम्ति नगरपालिकाले उल्लेख्य बजेटको व्यवस्थापन गरेको बताउँदै नगरप्रमुख श्रेष्ठले वास्तविक सुकुम्बासीहरू पुर्जा पाउन बाट नछुट्ने गरी काम अघि बढाउनु पर्ने बताए ।

भूमि आयोगका केन्द्रीय अध्यक्ष हरिप्रसाद रिजालले अहिले नेपालभर अव्यवस्थित बसोबासी, भुमीहिन सुकुम्बासी र भूमिहीन दलित दलित नयाँ र पुराना गरी १२ लाख १३ हजार भुमिहिन हरुको निवेदन परेको बताउँदै सबैलाई आफू बसेको भूमिको स्वामित्व दिलाउन आयोग तत्पर रहेको बताए ।

पूर्व गृहराज्यमन्त्री मन्त्री देवेन्द्र राज कँडेलले जग्गा पाएका सुकुम्बासीले १० वर्ष सम्म उक्त जग्गा बिक्री बितरण गर्न नपाउने प्रावधान रहेकाले वित्तीय संघ संस्थाहरूमा आफ्नो जमिन राखेर ऋृण लिन पाउने सुविधा राज्यले तयार गर्नु पर्नेमा जोड दिए ।

बर्दघाट नगरपालिकामा भूमिहीन दलित ८४४, भूमिहिन सुकुम्बासी १४८१ र अव्यवस्थित बसोवासी ४९४५ गरी कुल ७२७० जनाको निवेदन प्रविष्ट भएको नगर प्रमुख शम्भुलाल श्रेष्ठले जानकारी दिए । आयोगका जिल्ला अध्यक्ष लाल बहादुर गुरुङले भुमिहिनहरु बसोबास गर्दै आएका कतिपय जमिनहरू खरबारी जस्ता क्षेत्रहरू भनेर उल्लेख भएको हुँदा त्यसको ब्यवस्थापनमा कठिनाई भएकाले त्यसको समाधानका लागि मन्त्री अधिकारीलाई आग्रह गरे।वडा नम्बर ५ मा आज ६७ जनालाई पुर्जा बितरण गरिएको छ भने अन्यको समेत प्रक्रिया अघि बढाईएको छ ।

कार्यक्रममा लुम्बिनी प्रदेशका वन तथा वातावरण मन्त्री देवकरण कलवार, सांसद सरिता भुसाल, बिश्वप्रेम पाठक, संविधान सभा सदस्य विक्रम खनाल लगायतको उपस्थिति रहेको थियो ।