काठमाडौं ।
अबदेखि स्वास्थ्य बीमा गरेका नागरिकलाई पहिलोपटक उपचारका लागि अनिवार्य रूपमा आफूले बीमा गराएको स्थानको ‘प्रथम सेवा बिन्दु’मै जानुपर्ने झन्झट हटेको छ। स्वास्थ्य बीमा बोर्डले साउन १ गतेदेखि लागू हुने गरी बीमितलाई देशभरका जुनसुकै नजिकका अनुमतिप्राप्त सरकारी स्वास्थ्य संस्थाबाट सेवा लिन सक्ने सुविधा उपलब्ध गराउने निर्णय गरेको हो।
यसअघि स्वास्थ्य बीमा सुरु गर्दा बीमितले अनिवार्य रूपमा आफू दर्ता भएको स्थानको पहिलो सेवा बिन्दुबाट मात्र उपचार सेवा लिनुपर्ने व्यवस्था थियो। यो प्रणालीले विशेषगरी यात्रा, स्थानान्तरण वा आकस्मिक अवस्थाका बेला नागरिकलाई रेफरल प्रक्रिया झन्झटिलो बनाएको थियो।
अब भने बीमा अवधि भरिमा बीमितले देशभर जुनसुकै अनुमतिप्राप्त सरकारी अस्पतालबाट प्रत्यक्ष रूपमा सेवा लिन सक्नेछन्। स्वास्थ्य बीमा ऐन २०७४ र नियमावली २०७५ मा गरिएको संशोधनअनुसार यो व्यवस्था लागू गरिएको हो।
स्वास्थ्य बीमा बोर्डका सूचना अधिकारी विकेश मल्लका अनुसार, नागरिकबाट लगातार गुनासो आइरहेकाले सेवा प्रणालीलाई लचिलो बनाउने निर्णय गरिएको हो। उनले उदाहरण दिँदै भने, ‘यदि कसैले इलाममा बीमा गरेको छ भने पनि अब काठमाडौं पुगेर त्यहाँको अनुमतिप्राप्त अस्पतालमा सेवा लिन सक्नेछ।’
बोर्डले विश्वास लिएको छ कि यस व्यवस्थाले सेवाग्राहीको समय, खर्च र झन्झट कम हुनेछ। साथै, आकस्मिक उपचारका बेला तुरुन्तै सेवा पाउन सहज हुनेछ।
स्वास्थ्य मन्त्रालयको प्रस्तावमा मन्त्रिपरिषद्को १७ बैशाखको बैठकले नियमावली संशोधन गर्दै यो निर्णय गरेको थियो। त्यस निर्णयलाई कार्यान्वयनमा लैजाँदै स्वास्थ्य बीमा बोर्डले सार्वजनिक सूचना जारी गरेको हो।
