खोज

चन्द्रौटा, २० असार । 

“हामी पढ्न त जान्थ्यौँ, तर गर्मीमा कक्षाकोठा भट्टी जस्तै हुन्थ्यो ।” विजयनगर गाउँपालिकास्थित एक विद्यालयकी आठ कक्षामा अध्ययनरत छात्रा रजनी कुमारी घर्तीले भनिन् । “कहिले–काहीँ त खपिनसक्नु हुन्थ्यो । “तर अब स्थिति फेरिँदै छ । कपिलवस्तुको विजयनगर गाउँपालिकाका सामुदायिक विद्यालयमा टिनको छाना हटाएर सुदृढ संरचना बनाउने योजना सुरु भएको छ । गाउँपालिकाका ११ विद्यालयले सङ्घीय सरकारबाट प्रति विद्यालय कम्तीमा १ करोड रुपैयाँको अनुदान पाएका छन् ।

गाउँपालिकाका अध्यक्ष गोपाल बहादुर थापाले टिनका छानाले गर्मी, जाडो र वर्षा तीनै मौसममा विद्यार्थी र शिक्षकलाई समस्या हुने गरेको बताए । उनले भने “अब हामी शिक्षा क्षेत्रमा केवल पाठ्यपुस्तक होइन, संरचना पनि सुधार्दै छौँ ।” उनका अनुसार आगामी आर्थिक वर्षमा उक्त अनुदान रकम माध्यमिक तह र कक्षा ८ सम्मका विद्यालय सुधारमा खर्च गरिनेछ ।

शिक्षा, युवा तथा खेलकुद शाखा प्रमुख हरिहर बेल्बासेले टिनका छानाबाट चुहिने पानी र आवाजले कहिलेकाहीँ पढाइ रोक्नुपर्ने अवस्था आउने गरेको बताए । “अब ती सबै समस्या अन्त्य हुन्छन् । विद्यालयको भौतिक सुधार सँगसँगै सिकाइ वातावरणमा पनि सुधार आउने आशा छ”: उनले भने । उनका अनुसार पालिकामा ४४ विद्यालय मध्ये २६ सामुदायिक विद्यालय र १८ वटा परम्परागत धार्मिक विद्यालय (मदरसा) छन् । गर्मी र जाडो मौसम अनुकूल हुने कक्षाकोठा सुरक्षित र बालमैत्री बन्नेछन् ।

अनुदान प्राप्त गर्ने विद्यालयहरूमा थरौली आवि, नेपाल तारा मावि, जनजागृति मावि, त्रिनेत्र मावि, जनज्योति मावि लगायतका विद्यालय समावेश छन् । तीन विद्यालय–हरिबोध मावि, प्रेमनगर र मदरसा कदरिया फैजल उलुम, बरगदवाले रु. १ करोड ५० लाखको विशेष अनुदान पाएका छन् । स्थानीय शम्भु यादव भन्छन्, “हामी गाउँलेले कहिल्यै सोचेका थियौँ कि हाम्रा सन्तानहरूले चिसो र हावायुक्त कोठामा पढ्ने मौका पाउँछन् अब त लाग्छ, विजयनगर साँच्चै शिक्षामा अगाडि बढ्दै छ ।”