खोज

काठमाडौँ ।

संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले सरकारी कर्मचारीहरूमा समर्पित भएर काम गर्ने प्रवृत्ति नरहेको टिप्पणी गरेका छन्। शुक्रबार संसदको अन्तर्राष्ट्रिय सम्बन्ध तथा पर्यटन समितिको बैठकमा बोल्दै उनले यस्तो बताएका हुन्।

नेपाल नागरिक उड्डयन प्राधिकरण विधेयक, २०८१ सम्बन्धी सैद्धान्तिक छलफलमा सांसदहरूले उठाएका प्रश्नहरूको जवाफ दिने क्रममा मन्त्री पाण्डेले नेपाल एयरलाइन्समा धेरै कर्मचारी हुँदा पनि अपेक्षित सुधार नआएकोप्रति ध्यानाकर्षण गराए। सांसदहरूले निजी क्षेत्रका एयरलाइन्सहरू थोरै जनशक्तिमा मुनाफा कमाइरहेका बेला नेपाल एयरलाइन्स भने धेरै जनशक्तिका बाबजुद घाटामा किन चलिरहेको भन्ने प्रश्न उठाएका थिए।

मन्त्री पाण्डेले नेपाल एयरलाइन्सले ग्राउण्ड ह्याण्डलिङको काम समेत गर्ने भएकाले त्यसका लागि बढी जनशक्ति आवश्यक पर्ने स्पष्ट पारे। तर उनले कर्मचारीहरूमा कामप्रतिको समर्पण कमजोर भएको र सुशासनको कमी रहेको स्वीकार गरे। उनले सुशासनका पाटाहरू सुधार गर्नु अत्यावश्यक रहेको बताए।

उनका अनुसार नेपाल एयरलाइन्सका कर्मचारीहरूको सेवा तथा शर्तसम्बन्धी विनियमावली निर्माणको काम भइरहेको छ। साथै, आवश्यकता भन्दा बढी जनशक्ति नराख्ने र आर्थिक भार नबढाउने दिशामा सरकार गृहकार्य गरिरहेको जानकारी पनि उनले दिए।