खोज

काठमाडौं ।

नेपाल उद्योग वाणिज्य महासङ्घका अध्यक्ष चन्द्रप्रसाद ढकालले स्पेनका उद्यमी र व्यवसायीहरूलाई नेपालमा लगानीमैत्री वातावरण निर्माण भएको बताउँदै ढुक्क भएर लगानी गर्न आग्रह गरेका छन्।

बुधबार स्पेनको म्याड्रिडस्थित नेपाली दूतावासले आयोजना गरेको एक विशेष कार्यक्रममा बोल्दै अध्यक्ष ढकालले पर्यटन, ऊर्जा, कृषि, सूचना प्रविधि तथा पूर्वाधारजस्ता क्षेत्रमा लगानीको अपार सम्भावना रहेको जानकारी गराए। उनले नेपालको समग्र आर्थिक विकासमा निजी क्षेत्रको महत्वपूर्ण भूमिका रहेको उल्लेख गर्दै विदेशी लगानीकर्तालाई सहज र सुरक्षात्मक वातावरण सुनिश्चित गरिएको बताए।

कार्यक्रममा स्पेन वाणिज्य तथा उद्योग महासङ्घका सदस्यहरू, स्थानीय व्यापारी समुदायका अगुवा, नेपाली समुदायका प्रतिनिधि र कूटनीतिक क्षेत्रका व्यक्तित्वहरूको उल्लेख्य उपस्थिति थियो। सो अवसरमा अध्यक्ष ढकालले नेपालको अर्थतन्त्रको मेरुदण्डका रूपमा रहेको पर्यटन उद्योगमा लगानी गरेमा सहजै प्रतिफल प्राप्त गर्न सकिने तर्क गरे।

सगरमाथा र लुम्बिनीजस्ता ऐतिहासिक, धार्मिक तथा प्राकृतिक स्थलहरूप्रति विश्वभरका मानिसहरूको आकर्षण रहेको उल्लेख गर्दै उनले यस्ता गन्तव्यलाई अझ प्रभावकारी बनाउन गुणस्तरीय सेवा तथा पूर्वाधारमा लगानी गर्न आवश्यक रहेको बताए। अध्यक्ष ढकालले लगानीकर्तालाई नेपालले दिँदै आएको नीति तथा प्रोत्साहनबारे पनि जानकारी गराएका थिए।