खोज

काठमाडौं ।

सामाजिक सञ्जालमार्फत गायक–गायिकालाई लक्षित गर्दै गालिगलौज र लान्छना लगाउने कार्यमा संलग्न एक युवक पक्राउ परेका छन्। गायिका एलिना चौहानको उजुरीपछि साइबर ब्युरोले चितवन स्थायी घर भई ललितपुरको बाँडेगाउँमा बस्दै आएका ३३ वर्षीय गुन्जन राईलाई नियन्त्रणमा लिएको हो।

साइबर ब्युरोका अनुसार राईले करिब ४०–५० वटा नक्कली फेसबुक आईडीहरू बनाएर तीमार्फत चौहानमाथि आपत्तिजनक र अपमानजनक टिप्पणी गर्दै आएका थिए। प्रहरीले ती सबै नक्कली आईडीहरू बन्द गरिसकेको जनाएको छ।

गायिका चौहानले आफूलाई लक्षित गरी लामो समयदेखि अशोभनीय कमेन्ट भइरहेकाले बाध्य भएर उजुरी दिनुपरेको बताएकी छन्। यसअघि उनले अर्की गायिका समीक्षा अधिकारीसँगै यस्ता अपमानजनक कमेन्ट गर्ने प्रयोगकर्ताका प्रोफाइलहरू सार्वजनिकसमेत गरेकी थिइन्।

तर पनि यस्ता कमेन्ट रोकिएनन्। अन्ततः चौहानले साइबर ब्युरोमा जाहेरी दर्ता गरिन्। यसै सन्दर्भमा उनी र समीक्षा अधिकारीले गृहमन्त्री रमेश लेखकसँग भेटेर यस विषयमा ध्यानाकर्षण गराएका थिए। गृहमन्त्री लेखकले प्रहरीलाई यस्ता साइबर अपराधमा कडाइका साथ कारबाही गर्न निर्देशन दिएका थिए।

पक्राउ परेका गुन्जन राईविरुद्ध प्रहरीले आजै म्याद थपको प्रक्रिया अघि बढाइरहेको जनाएको छ। साइबर ब्युरोले यस घटनालाई साइबर अपराधसम्बन्धी गम्भीर मुद्दाको रुपमा लिएको बताएको छ।