खोज

काठमाडौं ।

देशको बैंकिङ प्रणालीमा अत्यधिक तरलता बढेपछि नेपाल राष्ट्र बैंकले आज (बुधबार) ६० अर्ब रुपैयाँ बराबरको तरलता प्रणालीबाट फिर्ता लिन लागेको छ। राष्ट्र बैंकको मौद्रिक व्यवस्थापन विभागले दिएको जानकारीअनुसार यो रकम ६३ दिन अवधिका लागि निक्षेप संकलन उपकरण मार्फत खिचिनेछ।

यसअघि गत आइतबार पनि राष्ट्र बैंकले ३० अर्ब रुपैयाँ बराबरको तरलता खिचिसकेको थियो। लगातार दोस्रो पटक तरलता संकलनको निर्णयबाट बैंकिङ प्रणालीमा मौद्रिक व्यवस्थापनलाई थप सन्तुलनमा ल्याउने संकेत देखिन्छ।

राष्ट्र बैंकले जारी गरेको विवरणअनुसार, इच्छुक ‘क’, ‘ख’ र ‘ग’ वर्गका इजाजतप्राप्त बैंक तथा वित्तीय संस्थाहरूले उक्त बोलकबोल प्रक्रियामा सहभागी हुन सक्नेछन्। उनीहरूले कम्तीमा १० करोडदेखि बढीमा ५ करोडको गुणांकमा प्रस्ताव पेश गर्न सक्ने व्यवस्था गरिएको छ। यसरी प्राप्त बोलकबोलको ब्याजदर प्रतिस्पर्धात्मक प्रक्रियामार्फत निर्धारण गरिनेछ।

यस निक्षेप संकलन उपकरणमार्फत खिचिएको रकमको साँवा र ब्याजको भुक्तानी १८ भदौमा हुनेछ। राष्ट्र बैंकको यो कदमलाई बढ्दो तरलता, घट्दो माग र ब्याजदरमा अस्थिरता नियन्त्रण गर्नका लागि उठाइएको रणनीतिक चालका रूपमा विश्लेषण गरिँदैछ। वित्तीय क्षेत्रको सन्तुलनमा यसले कस्तो प्रभाव पार्नेछ भन्ने विषयमा बैंकिङ विश्लेषकहरू थप मूल्यांकन गरिरहेका छन्।