काठमाडौँ ।
राष्ट्रियसभाको आजको बैठक प्रारम्भ भएको छ। बैठकको कार्यसूचीअनुसार उपप्रधानमन्त्री तथा अर्थमन्त्री विष्णुप्रसाद पौडेलले प्रतिनिधिसभाबाट सन्देशसहित प्राप्त ‘विनियोजन विधेयक, २०८२’ लाई पारित गरियोस् भन्ने प्रस्ताव पेश गर्ने तयारी गरिएको छ।
यसै विधेयकअन्तर्गत राष्ट्रपतिको कार्यालय, उपराष्ट्रपतिको कार्यालय, प्रधानमन्त्री तथा मन्त्रिपरिषद्को कार्यालय, राष्ट्रिय योजना आयोगको सचिवालयजस्ता विभिन्न शीर्षकहरूमा विनियोजित बजेटमाथि उठेका प्रश्नहरूको उत्तर दिने कार्यसूची रहेको छ। त्यस्तै सहरी विकास, सञ्चार, ऊर्जा, भौतिक, कृषि, रक्षा, अर्थ, शिक्षा, श्रम तथा युवा तथा खेलकुद मन्त्रालयसम्बन्धी बजेटबारे उठेका प्रश्नहरूको जवाफ सम्बन्धित मन्त्रीहरूले दिनेछन्।
आजै अर्थमन्त्री पौडेलले आर्थिक विधेयक, २०८२ र राष्ट्र ऋण उठाउने विधेयक, २०८२ लाई पनि विचार गरियोस् भन्ने प्रस्ताव राष्ट्रियसभामा प्रस्तुत गर्नेछन्। त्यसैगरी, विधायन व्यवस्थापन समितिको प्रतिवेदनसहित भन्सार विधेयक, २०८० माथि छलफल गरियोस् र पारित गरियोस् भन्ने प्रस्ताव समेत बैठकमा प्रस्तुत गरिने छ।
बैठकमा राष्ट्रियसभाका सचिव डा. सुरेन्द्र अर्यालले ‘सङ्घीय निजामती सेवा विधेयक, २०८०’ सम्बन्धी प्रतिनिधिसभाबाट प्राप्त सन्देश सभामुखसमक्ष टेबुल गर्ने कार्यसूची पनि रहेको छ।
