खोज

काठमाडौं।

नेकपा एकीकृत समाजवादीका वरिष्ठ उपाध्यक्ष राजेन्द्र पाण्डेले संघीय निजामती सेवा विधेयकमा रहेको कुलिङ पिरियड प्रावधानमा उच्च पदस्थ कर्मचारीहरूबाट गम्भीर चलखेल भएको आशंका व्यक्त गरेका छन्।

आज बसेको प्रतिनिधिसभाअन्तर्गतको राज्यव्यवस्था तथा सुशासन समितिको बैठकमा बोल्दै पाण्डेले मुख्य सचिवदेखि सचिवहरूले प्रधानमन्त्रीलाई धम्की दिँदै कुलिङ पिरियड नराख्न दबाब दिएको घटनालाई स्मरण गराउँदै ती अधिकारीहरूमाथि शंका उठाएका हुन्।

उनको भनाइ थियो, “हाम्रो मनभित्र पर्दाभित्र यिनै उच्च कर्मचारीहरूले खेलिरहेका हुन् भन्ने लागिरहेको छ।” उनले स्पष्ट रूपमा प्रधानमन्त्रीलाई “संयुक्त राजीनामा” दिने चेतावनीसहित धम्की दिने कर्मचारीहरूको भूमिकालाई औंल्याउँदै गम्भीर छानबिन आवश्यक रहेको बताए।

पाण्डेले भने, “कुलिङ पिरियड राख्न संसदीय समिति र सबै राजनीतिक दल एकमत हुँदा पनि अब गडबडी गर्न तलबाट ‘घुनपुतली’ लगाइयो भन्ने शंका बलियो भएको छ। त्यसैले त्यो शंका निवारण गर्न छानबिन समिति गठन गर्नुपर्छ।”

साथै, उनले समितिका सभापति रामहरि खतिवडामाथि पनि कमजोरी भएको उल्लेख गरे।
“सभापतिज्यूको भूमिकामा पनि कमजोरी देखियो। यस्तो गल्ती दोहोरिन नदिन हामीले समयमै सजग हुनुपर्छ,” पाण्डेले बैठकमा टिप्पणी गरे।

यसरी वरिष्ठ उपाध्यक्षको धारणा संसदमा कर्मचारीतन्त्रको प्रभाव, पारदर्शिता र विधायन प्रक्रियामा हस्तक्षेपबारे उठेका गम्भीर प्रश्नहरूमाथि केन्द्रित देखिन्छ।