खोज

पश्चिम नवलपरासी ।

पश्चिम नवलपरासीको बर्दघाट नगरपालिकाले आर्थिक वर्ष ८१/८२ लाई शैक्षिक सुधार वर्षको रूपमा अघि बढाएको थियो ।मूलतः सामुदायिक विद्यालयको शैक्षिक गुणस्तर सुधारका लागि सुधार वर्षको रूपमा लिइएको नगरपालिकाले जनाएको छ ।सोही अनुरूप अहिले एसईई को नतिजाको सुधारोन्मुख प्रतिफलले पनि यसलाई पुष्टि गरेको नगर प्रमुख शम्भुलाल श्रेष्ठले बताए ।

शिक्षामा प्रविधिको प्रयोग गरी निजी विद्यालय र सरकारी विद्यालयबीचको शैक्षिक गुणस्तरको खाडल कम गर्न पनि यो महत्त्वपूर्ण रहने नगरप्रमुख श्रेष्ठको भनाई छ ।डिजिटल प्रविधिमा आधारित पठनपाठनलाई प्रोत्साहन गर्न नगरपालिकाले सङ्घीय सरकारको विशेष अनुदान तर्फको बजेट बाट आगामी आर्थिक वर्ष ८२/८३ का लागि १ करोड ६४ लाख रुपैयाँ विनियोजन गरेको छ ।

विनियोजित उक्त बजेटबाट मावि र आधारभूत तहका सबै विद्यालयमा स्मार्ट बोर्ड जडान ,पहिलो चरणमा १ सय ३० जना शिक्षकलाई लागत साझेदारीमा ल्यापटप वितरण गरिने नगरप्रमुख शम्भुलाल श्रेष्ठले बताए । “हामी निर्वाचित भएदेखि नै शिक्षालाई विशेष प्राथमिकतामा राख्दै आएका छौँ, युग अनुसारको शिक्षण सिकाइ हुनु पर्छ र यसले गुणस्तरमा समेत परिवर्तन ल्याउँछ भन्ने हेतुले प्रविधि मैत्री शिक्षालाई जोड दिएका हौँ” श्रेष्ठले भने ।प्रविधि युक्त विद्यालय निर्माणका लागि सबै शिक्षकहरूलाई प्राविधिक तालिम समेत दिइने छ ।

उपप्रमुख रुद्र प्रकाश उपाध्यायले भौतिक पूर्वाधारको विकासले मात्रै समृद्ध नगर परिकल्पना हुन सक्दैन मानवीय विकास सँगै शिक्षाको गुणस्तरलाई अब्बल बनाउन सकिए मात्र अन्य विकास निर्माणको सार्थकता रहने उल्लेख गरे ।

विद्यालयको पूर्वाधार विकास ,प्रभावकारी शिक्षण सिकाइ लगायत गुणस्तर सुधारका निम्ति नगरपालिकाले सामाजिक विकास समितिलाई सक्रिय बनाएको थियो ।सोही अनुरूप समितिले नगरभित्रका ३७ वटै विद्यालयको अवस्थाको बारेमा अध्ययन गरी प्रभावकारी योजनाहरू तयार गरिएको निवर्तमान सामाजिक विकास समिति संयोजक भिमकाजी गुरुङले बताए ।”हामीले विगतका नतिजाहरू हेरेर नै खरो रूपमा उत्रियौँ पुरानै प्रवित्ति बाट शैक्षिक क्षेत्रमा सुधार हुँदैन भन्ने लागेर नै कतिपय अवस्थामा हामी निर्मम भएर नै अघि बढ्यौ फलतः हाम्रो मेहनत सकारात्मक देखिँदै आएको छ”गुरुङले भने ।

राष्ट्रिय माविका प्रधानाध्यापक शेषकान्त पौड्यालले प्रविधि मैत्री शिक्षा विद्यालयमा निकै प्रभावकारी बनेको बताए ।”सिकेर गर्ने र गरेर सिक्ने कुरा भएकाले पनि प्रविधि अपरिहार्य नै हो”पौडेलको भनाई छ ।

शैक्षिक पद्धतिलाई प्रविधिमैत्री बनाई समयसापेक्ष ज्ञान तथा सीपहरू दिएको खण्डमा मात्र सिकाइ अर्थपूर्ण तथा दीर्घकालीन हुन्छ । तब मात्र सबल अनि समृद्ध नगरको कल्पना गर्न सकिनेमा सबै जनप्रतिनिधिहरू ऐक्यबद्ध भएर लागि परेको नगरपालिकाले जनाएको छ ।