काठमाडौँ।
नेपाल कम्युनिष्ट पार्टी (माओवादी केन्द्र) का अध्यक्ष तथा पूर्व प्रधानमन्त्री पुष्पकमल दाहाल ‘प्रचण्ड’ले संघीय निजामती सेवा विधेयक पारितको क्रममा गम्भीर षड्यन्त्र भएको बताउँदै त्यसको छानबिन र कडाइका साथ कारबाहीको माग गरेका छन्।
मंगलबार पेरिसडाँडामा आयोजित योङ कम्युनिष्ट लिग, नेपाल (वाइसिएल) केन्द्रीय पदाधिकारी बैठकलाई सम्बोधन गर्दै उनले विधेयकमा गरिएको चलखेल र छेडखानी सहन नहुने ठोकुवा गरे। प्रचण्डले भने, “परिवर्तनका उपलब्धिहरू उल्ट्याउने षड्यन्त्र हुँदै आएको छ। यो विधेयकमा पनि षड्यन्त्र भएको छ। कसले बदमासी गर्यो, त्यसको छानबिन गरियोस् र कारबाही गरियोस्।”
उनले संविधान र जनताको रगत पसिनाबाट प्राप्त उपलब्धिहरूलाई उल्ट्याउने प्रवृत्ति पहिले पनि देखिएको र अहिले पुनः यस्तो जोखिम बढेको बताउँदै पार्टीले यसविरुद्ध दृढता देखाउनुपर्ने जोड दिए।
प्रचण्डले वाइसिएल नेपाललाई पार्टीको विचार, विधान र लाइन प्रति पूर्ण प्रतिबद्धताका साथ काम गर्न आग्रह गर्दै भने, “वाइसिएल पार्टीको उत्तराधिकारी सङ्गठन हो, जसले प्रतिक्रियावादी षड्यन्त्रलाई चिर्ने शक्ति हो।”
युवाहरुलाई जनताको समस्या समाधानमा अग्रपङ्क्तिमा रहन आग्रह गर्दै प्रचण्डले वर्तमान वर्ग संघर्ष थप पेचिलो बन्दै गएको अवस्था र विचार तथा नेतृत्वको रक्षा गर्न एकताबद्ध हुने आवश्यकतालाई जोड दिए।
उनले महाधिवेशनले निर्वाचित नेतृत्व र विचारको संरक्षण र संस्थागत गर्न सबैमा आग्रह गर्दै क्रान्तिकारी धारलाई बलियो बनाउनुपर्ने बताए।
