खोज

हैदराबाद, १७ असार  ।

भारतको दक्षिणी राज्य तेलङ्गानाको एक औद्योगिक क्षेत्रमा रहेको औषधी कारखानामा भएको शक्तिशाली विस्फोट र त्यसपछिको आगलागीमा कम्तीमा ३६ जनाको ज्यान गएको छ भने करिब तीन दर्जन कामदार घाइते भएका छन्।

राज्यको राजधानी हैदराबादबाट करिब ५० किलोमिटर टाढा रहेको सिगाची इन्डस्ट्रिज नामक कम्पनीको औषधी उत्पादन युनिटमा सोमबार भएको घटनापछि राज्यभर शोक र स्तब्धता छाएको छ।

राज्यका दमकल सेवा निर्देशक जी.भी. नारायण रावका अनुसार दमकलकर्मीहरूले घटनास्थलबाट ३४ जना कामदारका जलेका शवहरू उद्धार गरेका छन् भने अन्य दुई जनाको अस्पतालमा मृत्यु पुष्टि गरिएको छ। थप कामदारहरू भग्नावशेषमा फसेको हुनसक्ने आशंकासहित खोजी कार्य जारी रहेको जनाइएको छ।

विस्फोटको स्रोत कारखानाको स्प्रे ड्रायर युनिट रहेको र त्यसैबाट आगलागी फैलिएको प्रारम्भिक अनुसन्धानमा देखिएको छ। यो युनिट कच्चा औषधी सामग्रीलाई प्रशोधन गरी पाउडरमा रूपान्तरण गर्न प्रयोग हुने अत्यधिक संवेदनशील उपकरण हो।

घटनाको बेला कारखानाभित्र १०८ जना कामदार रहेको राज्यका स्वास्थ्यमन्त्री दामोदर राजा नरसिंहले जानकारी दिएका छन्। उनले शवहरू चिनिन नसक्ने गरी जलेको भन्दै पहिचानका लागि डिएनए परीक्षण गर्न विशेष मेडिकल टोली परिचालन गरिएको बताए।

प्रत्यक्षदर्शीहरूका अनुसार विस्फोटको आवाज केही किलोमिटर टाढाबाट समेत सुन्न सकिने गरी शक्तिशाली थियो। घटनास्थलको सम्पूर्ण संरचना ध्वस्त भएको छ भने बाँकी भग्नावशेष हटाउने काम तीव्र पारिएको छ।

सिगाची इन्डस्ट्रिज लिमिटेड नामक उक्त कम्पनी भारतको प्रतिष्ठित औषधि कम्पनी हो, जसका देशभर पाँच उत्पादन केन्द्रहरू छन् र अमेरिका तथा यूएईमा सहायक कार्यालयहरू सञ्चालनमा छन्।

औद्योगिक सुरक्षाको दृष्टिले यस्तो दुर्घटना दुर्भाग्यपूर्ण र चिन्ताजनक रहेको भन्दै राज्य सरकारले घटनाको कारण छानबिन गर्न समिति गठन गरेको छ। भारतमा यस्ता रासायनिक कारखानाहरूमा हुने दुर्घटनाहरू बारम्बार दोहोरिरहेकाले सुरक्षा मापदण्डमा कठोरता अपनाउनु पर्ने आवाज फेरि एकपटक बलियो बनेको छ।