खोज

 काठमाडौं ।

एसीसी मेन्स यू-१६ इस्ट जोन क्रिकेट प्रतियोगितामा नेपालले भुटानविरुद्ध इतिहास रच्दै समूह चरणको अन्तिम खेलमा २९८ रनको विशाल जित निकालेको छ। ब्याटिङमा रौनक श्रीवास्तवको विस्फोटक प्रदर्शन र बलिङमा कप्तान बिपिन प्रसाद शर्माको घातक बलिङले नेपाललाई फराकिलो जित दिलायो।

टस जितेर पहिला ब्याटिङ गरेको नेपालले ५० ओभरमा ५ विकेट गुमाएर ३५८ रन बनायो। यो प्रतियोगितामा नेपालको दोस्रो ठूलो स्कोर हो। यसअघि नेपालले इन्डोनेसियाविरुद्ध ४२० रन बनाएको थियो।

इनिङको मुख्य आकर्षण बने रौनक श्रीवास्तव, जसले १३२ बलमा १६ चौका र ५ छक्कासहित १६८ रन बनाए। नेपाली यू-१६ इतिहासमै यो अहिलेसम्मकै सबैभन्दा ठूलो व्यक्तिगत स्कोर हो। रौनकले शुरुवाती दुई विकेट चाँडै गुमाएपछि शिवांश बजगाइसँग मिलेर टोलीलाई उकासे। उनीहरूले ९१ रनको साझेदारी गरे। त्यसपछि सुगम बुढाथोकीसँग ७२ रन र अन्तमा जोय थापासँग १७० रनको विशाल साझेदारी गर्दै नेपाललाई बलियो अवस्थामा पुर्‍याए।

जवाफी ब्याटिङमा उत्रिएको भुटान ३२.४ ओभरमै ६० रनमा समेटियो। वर्षा सुरु हुनुअघि नवौं विकेट गुमाइसकेको भुटानको अन्तिम ब्याटर मैदानमा आउन नसक्ने भएपछि खेल सकिएको घोषणा गरियो। कप्तान बिपिन शर्माले १० ओभरमा ७ रन खर्चेर ४ विकेट लिए। सचिन भट्टले पनि किफायती बलिङ गर्दै २ विकेट लिए भने सुयोग भट्टराईले पनि २ विकेट हात पारे।

भुटानका सेजाङ दावाले १४ र उगेन केल्जाङले १० रन बनाए। बाँकी ब्याट्सम्यान नेपाली बलरहरूसामु निरीह देखिए।

यसअघि नेपालले सिंगापुर, जापान र इन्डोनेसियामाथि एकपक्षीय जित निकालेको थियो। चारवटै खेल जित्दै नेपाल समूह ए को शीर्ष स्थानमा रह्यो र सेमिफाइनलमा मलेसियासँग प्रतिस्पर्धा गर्ने भएको छ।

नेपालको यू-१६ टोलीले प्रतियोगिता भरि देखाएको उत्कृष्ट प्रदर्शनले नेपाली क्रिकेटको भविष्य उज्यालो बनाउने विश्वास थप बलियो बनाएको छ।