काठमाडौं।
नायिका रेखा थापाले गृहमन्त्री रमेश लखेकलाई बधाई दिँदै आमाको नामबाट नागरिकता प्राप्त गर्न सकिने व्यवस्था स्वागतयोग्य भएको प्रतिक्रिया दिएकी छिन्।
मंगलबार गृहमन्त्री लखेसँग भेट गरी बधाई व्यक्त गरेकी थापाले सामाजिक सञ्जालमार्फत आफ्नो धारणा सार्वजनिक गरेकी हुन्। उनले फेसबुकमा लेखेकी छिन्, “सन्तानलाई आमाले जन्म दिनुहुन्छ, आमाले पालन पोषण गर्नुहुन्छ, तर नागरिकता लिन जाँदा बाबुको खोजी हुन्छ! अब त्यो अवस्था अन्त्य भएको छ।”
रेखाले यो निर्णयलाई “साहसिक र ऐतिहासिक कदम” भन्दै सरकार र गृहमन्त्रीलाई धन्यवाद दिइन्। साथै उनले नागरिकता बिहीन नेपालीहरूलाई बधाई दिँदै यो व्यवस्था महिला अधिकारका क्षेत्रमा भएको सुनौलो प्रगति भएको उल्लेख गरेकी छन्।
आजै नेपाल नागरिकता (दोस्रो संशोधन) विधेयक, २०८१ प्रतिनिधिसभाबाट पारित भई राष्ट्रिय सभामा टेबुल गरिएको छ। विधेयकले आमाको नामबाट सन्तानले नागरिकता प्राप्त गर्न सक्ने स्पष्ट व्यवस्था गरेको छ, जुन विषय वर्षौंदेखि विवाद र बहसको केन्द्रमा थियो।
थापाले लामो समयदेखि सामाजिक विषयमा धारणा राख्ने कलाकारका रूपमा आफूलाई चिनाउँदै आएकी छिन्। उनले यस पटक पनि नागरिकताको संवेदनशील मुद्दामा प्रष्ट समर्थन जनाएकी हुन्।
