खोज

काठमाडौं, १७ असार ।

नेपाल समाजवादी पार्टी (नेसपा) का अध्यक्ष तथा पूर्वप्रधानमन्त्री डा. बाबुराम भट्टराईले संघीय निजामती सेवा विधेयकमा संसदको राज्य व्यवस्था समितिबाट पारित ‘कुलिङ अफ पिरियड’ प्रावधान जालसाजीपूर्ण ढंगले हटाइएको घटनालाई विश्वकै लाजमर्दो राजनीतिक ठगीको रूपमा वर्णन गरेका छन्।

मंगलबार सामाजिक सञ्जालमा प्रतिक्रिया दिँदै भट्टराईले यस्तो कदमले नेपालमा राज्य संरचना र राजनीतिक नेतृत्व कति गहिरो साँठगाँठमा आधारित छ भन्ने कुरा प्रष्ट भएको बताएका छन्।

उनले भने, ‘कूलिंग अफ पिरियड’ अर्थात् सरकारी कर्मचारीहरूले अवकाश वा राजीनामा पछि अर्को ठूलो सरकारी पदमा प्रवेश गर्न कम्तीमा दुई वर्ष पर्खनुपर्ने संसदीय प्रावधानलाई जालसाजीपूर्ण तरिकाले हटाएर संसदबाट पारित गराइएको यो घटना नेपाल मात्र होइन, विश्व इतिहासकै निकृष्ट र लाजमर्दो राजनीतिक ठगी हो।’

भट्टराईका अनुसार, उच्च तहका कर्मचारी र राजनीतिक नेतृत्वबीचको साँठगाँठले राज्यदोहन, राष्ट्रघात र जनविरोधी अपराधहरू भइरहेका छन् वा हुनसक्ने सम्भावना देखिएको छ। उनले यो घटनालाई यस्ता अपराधहरूको ‘जिउँदो र ताजा प्रमाण’ भनेका छन्।

उनले यस घटनाको मात्र भर्त्सना गरेर नपुग्ने भन्दै राज्य प्रणालीको अग्रगामी र लोकतान्त्रिक समाजवादी पुनर्संरचना आवश्यक रहेको उल्लेख गरे। भट्टराईले भने, ‘टालटुले सुधारले हुँदैन, समग्र राजनीति र राज्य प्रणालीको पुनर्संरचना गर्नैपर्छ। यही हाम्रो वैकल्पिक राजनीतिक अभियानको आधार हो।’