© २०२३
२२ मंसिर २०८२, सोमबार
२२ मंसिर २०८२, सोमबार
काठमाडौं ।
बाराको जितपुर सिमरा उपमहानगरपालिका–२१ स्थित चुरियामाई मन्दिरको जंगल क्षेत्रमा आइतबार साँझ भएको सवारी दुर्घटनामा एक जना ट्रक चालक तीन घण्टापछि सकुशल उद्धार गरिएका छन्।
उक्त दुर्घटना एउटै दिशातर्फ गइरहेका दुई ट्रक एकआपसमा ठोक्किँदा भएको हो। ठक्करपछि ट्रकको स्टेरिङमा च्यापिएका चालकलाई झ्याल काटेर उद्धार गर्न तीन घण्टा लागेको थियो। घाइते चालक चितवनको भरतपुर उपमहानगरपालिका–१६ निवासी अन्दाजी ३५ वर्षीय अरुण श्रेष्ठ रहेको पुष्टि भएको छ।
सशस्त्र प्रहरी बल नेपाल नं. १४ गण मकवानपुरबाट निरीक्षक अनिल कार्कीको कमाण्डमा खटिएको टोलीले श्रेष्ठको उद्धार गरेको सशस्त्र प्रहरीका सहप्रवक्ता डीएसपी शैलेन्द्र थापाले जानकारी दिए।
हेटौडाबाट पथलैयातर्फ गइरहेको ना ७ ख ७३०१ नम्बरको ट्रकलाई सोही दिशातर्फ जाँदै गरेको ना ६ ख ३७६३ नम्बरको ट्रकले ठक्कर दिएको थियो। दुर्घटनापछि दुवै ट्रक सडकको बायाँतर्फ पल्टिएका थिए।
उद्धार गरिएका श्रेष्ठ ना ६ ख ३७६३ नम्बरको ट्रकका चालक हुन्। उनलाई उपचारका लागि जिल्ला अस्पताल हेटौंडा पठाइएको छ। अर्का ट्रकका चालक सामान्य अवस्थामा रहेको र दुवै ट्रकमा चालकबाहेक अन्य कोही नरहेको प्रहरीले जनाएको छ।
© २०२३
सर्वाधिकार सुरक्षित
Design & Developed By:
