खोज

कपिलवस्तु, १६ असार ।

कपिलवस्तु नगरपालिकाका १ सय ५ जना नागरिकले मुटुरोगको निशुल्क उपचार पाएका छन् । कपिलवस्तु नगरपालिका वडा नम्बर १ को आर्थिक सहयोग र सरिम हस्पिटल प्रा.लि.को प्राबिधिक सहयोगमा सनलाईट सामाजिक बिकास केन्द्र कपिलवस्तु न.पा. ८ ले हस्पिटलमा आयोजना गरेको एक दिने मुटु सम्बन्धी स्वास्थ्य शिविरमा सो संख्याका बिरामीले उपचार सेवा लिएका हुन् ।

शिविरमा बिरामीहरुलाई निशुल्क परीक्षण, मुटुरोग उपचारबारे परामर्श, प्रयोगशाला, इसिजी, ईको र आवश्यकता अनुसारको औषधी निशुल्क उपलब्ध गराइएको हो । शिविरमा उपचारका लागि आएका कपिलवस्तु नगरपालिका १ का बिरामी मोहम्मद रियाजले आफुहरुले बुटवल पुगेर सशुल्क लिने उपचार सेवा टोल छिमेकमै शिविर मार्फत पाएकोमा खुसी लागेको बताए । सोही वडाकी हबिबुन निसाले आफुलाई मुटु, रक्तचाप, मधुमेह, हात झम्झमाउने समस्या रहेकोले उपचारका लागी अन्यत्र जानु पर्ने बाध्यता रहने गरेको बताइन् ।

आफ्नै गाउँ ठाँउमा निशुल्क उपचार सेवा पाउदाँ सुखी लागेको उनको भनाई थियो । निशुल्क मुटु स्वास्थ्य शिवीरमा १ सय ५ जनाको स्वास्थ्य परिक्षण गरिएकोमा ७९ जनाले ईको र ईसिजी सेवा, ४३ जनाले प्रयोगशाला सेवा र ८४ जनालाई आवश्यक औषधी बितरण गरिएको सरिम हस्पिटल प्रा.लिका सञ्चालक डाक्टर जाबेद अहमदले जानकारी दिए । शिवीरमा ६ जना नयाँ मुटु रोगी फेला परेको उनले स्पष्ट पारे ।

शिविरमा गौतमबुद्ध मुटु अस्पताल बुटवलमा कार्यरत मुटुरोग विशेषज्ञ डाक्टर मजहर खान नेतृत्वको स्वास्थ्यकर्मीहरुको टोलीले उपचारको सेवा दिएको थियो । टोलीमा थप दुई मेडिकल अधिकृतहरु डाक्टर खगेश्वर साह र डाक्टर रत्नेश्वर यादव सहितको स्वास्थ्यकर्मी उपाचारमा खटिएका थिए ।

शिविरका मुटु सम्बन्धी समस्याको रुपमा रहेको हर्ट अट्याक, मुटुको भल्वको समस्या, श्वाशप्रश्वास सम्बन्धी, रक्तचाप, मधुमेह र चिन्ता लगायतका समस्याका बिरामी उपचारका लागि आएको मुटुरोग बिशेषज्ञ डाक्टर मजहर खानले बताए । बिरामीलाई मुटु रोगको समयमै उपचार गर्न तथा समयमै लक्षण पहिचान गरी साबधानी अपनाउन सचेत बनाउनका लागि शिवीरले सहयोग गरेको सनलाईट सामाजिक बिकास केन्द्रका तर्फबाट व्यवस्थापनको भुमिका निर्वाह गरेका मोहम्मद ईरफान मन्सुरीले जानकारी दिए ।

गरिब र विपन्न नागरिकलाई शिविर आयोजनाले ठुलो राहत मिलेको उनको भनाई थियो । पछिल्लो समय खानपान, व्यायामको व्यवस्थापन नहुँदा मुटुरोगीको संख्या बढ्दै गएको अवस्थामा वडा र नगरबासीलाई निशुल्क मुटुरोगको उपचार र सहजताका लागि शिविरको आयोजनामा सहयोग गरिएको कपिलवस्तु नगरपालिका वडा नम्बर १ का अध्यक्ष मोहम्मद जाहिद खाँले बताए । उनले नागरिकको आवश्यकताका आधारमा आगामी दिनमा पनि स्वास्थ्य सेवा प्रदान गर्न वडा कार्यालय सदैव तत्पर रहेको जनाए ।