खोज

बुटवल, १५ असार ।

‘धान बालीमा सघनता खाद्य सुरक्षा र आत्मनिर्भरता’ भन्ने राष्ट्रिय नारासहित २२ औं राष्ट्रिय धान दिवस बुटवलमा विशेष कार्यक्रमका साथ धुमधामका साथ मनाइएको छ । बुटवल उपमहानगरपालिका वडा नं. १९ मनोहरापुर र वडा नं. १६ नरेनापुरमा छुट्टाछुट्टै कार्यक्रम गरी धान दिवस मनाइएको हो ।

दिवसको आइतबार बिहान एक कार्यक्रमकाबीच बुटवल उपमहानगरपालिकाका नगर प्रमुख खेलराज पाण्डेयले उदघाटन गरे । त्यस अवसरमा उनले बुटवल उपमहानगरपालिकाले कृषिलाई प्राथमिकतामा राखेर धान दिवसलाई उत्सवकै रूपमा मनाएको बताए ।

    प्रमुख पाण्डेयले धान खेती नेपालको कृषि क्षेत्रको मेरुदण्ड भएको बताउँदै कृषिमा आत्मनिर्भरता हासिल गर्न आधुनिक प्रविधि, अनुदान, बीउबिजन तथा सिँचाइ प्रणालीमा सुधार आवश्यक रहेको बताए ।

त्यस्तै उप–प्रमुख सावित्रा देवी अर्यालले कृषि क्षेत्रमा महिलाको योगदानलाई विशेष रुपमा सम्बोधन गर्नुपर्ने बताउदै महिला किसानको श्रम बिना हाम्रो खाद्य सुरक्षाको कल्पना गर्न नसकिने उल्लेख गरिन् ।

बुटवल उपमहानगरपालिका वडा नं १९ का वडा अध्यक्ष चन्द्रसिहं थापामगर, १६ का वडा अध्यक्ष कृष्णप्रसाद पौडेल, सचिवहरु राकृष्ण सुवेदी, जगतबहादुर केशी, संयोजक लक्ष्मी थारू लगायतले बढ्दो आयात, जलवायु परिवर्तन र कृषिमा युवाको घट्दो आकर्षणले गर्दा धान उत्पादनमा ह्रास आएको बताएका थिए ।

यता कृषक जानकी अर्यालका लागि असार १५ केवल रोपाईंको दिन मात्र होइन, उनको जीवनचक्रको एक महत्वपूर्ण मोड हो । बुटवल १६ बस्ने लक्ष्मीदेवी भन्छिन्, हामीले असार १५ लाई उत्सवको रूपमा मनाउँछौं, तर त्यो दिन हामी माटोमा पसिना साट्दै जीवनको आशा रोपिरहेका हुन्छौ ं।

कार्यक्रममा स्थानीय किसानहरूले परम्परागत भेषभूषामा सजिएर धान रोपाइँको प्रदर्शन गरेका थिए । साथै, महिला समूहहरूले कृषि गीत तथा नृत्य प्रस्तुत गरी कार्यक्रमलाई थप आकर्षक बनाएका थिए । कार्यक्रममा पञ्चेबाजा, मयुर नाचलगायत विभिन्न किसिमका झाँकी समेत प्रदर्शन गरिएको थियो ।