खोज

 गुल्मी, १४ असार ।

सडक कालोपत्रे र ढलान गर्न सुरु गरेसँगै गुल्मीको रेसुङ्गा नगरपालिका र गुल्मी दरबार गाउँपालिका अन्तरगतका दुई वटा सडकहरू केही दिनका लागि बन्द हुने भएका छन् । रेसुङ्गा नगरपालिका अन्तरगत देउरालीदेखि रेसुङ्गा विमानस्थल सडक कालोपत्रे गर्न सुरु गरिएपछि पाँच दिनका लागि उक्त सडकमा सवारी आवागमन बन्द गरिएको हो ।

निर्माण व्यवसायीको माग अनुसार सघन सहरी तथा भवन निर्माण आयोजनाका निमित्त आयोजना प्रमुख प्रविन वाग्लेले रेसुङ्गा नगरपालिकालाई पत्राचार गर्दै कालोपत्रे नसकिँदासम्म उक्त सडक बन्द गरिदिन आग्रह गरेका छन् । उक्त ठाउँमा कार्यालयले एकीकृत सहरी पूर्वाधार विकास कार्यक्रम अन्तरगत निर्माण कम्पनी इन्द्र यमके जेभी मार्फत सडक कालोपत्रे गर्न लागिएको हो ।

त्यसै गरी गुल्मी दरबार गाउँपालिका –१ स्थित डल्ली खोला–रैनादी सडक पनि आजदेखि एक केही दिनका लागि बन्द हुने भएको छ । उक्त सडक खण्डको डल्ली खोलादेखि रैनादीतर्फ जाने मोटर बाटोमा आजदेखि पक्की ढलानको काम सुरु भएको हुँदा सडक बन्द गरिएको वडाध्यक्ष राजेन्द्र कँडेलले जानकारी दिएका छन् । वडा कार्यालयबाट सडकको ढलानको काम नसकिँदासम्म वैकल्पिक सडक प्रयोग गर्न सर्वसाधारणमा सार्वजनिक सूचना समेत जारी गरिएको छ ।
स्थानीयहरूले भने निर्माण व्यावसायीहरुले समयमा काम नगरी अन्तिममा आएर सडक कालोपत्रे र ढलान गर्ने कार्यले वर्षादको समयमा नागरिकहरूलाई यात्रा गर्न समस्या उत्पन्न हुने गुनासो गरेका छन् ।