खोज

वाशिंगटन ।

इरान र इजरायलबीच युद्ध जारी रहेका बेला अमेरिका इरानसँग नयाँ कूटनीतिक पहल गर्न खोजिरहेको छ। सीएनएनको रिपोर्ट अनुसार, अमेरिका अहिले इरानलाई ३० अर्ब अमेरिकी डलर बराबरको सहयोग प्रस्ताव गर्ने तयारीमा छ। यो सहयोगमा आणविक ऊर्जा केन्द्र निर्माण, आर्थिक प्रतिबन्ध फुकुवा, र अन्य आर्थिक कार्यक्रमहरू समावेश गरिनेछ।

यो पहल अझै प्रारम्भिक चरणमा रहेको जनाइएको छ। अमेरिकी पूर्वराष्ट्रपति डोनाल्ड ट्रम्प प्रशासनले तयार पारेका प्रस्तावहरूमा समयअनुसार परिमार्जन सम्भव हुने जनाइएको छ। यद्यपि, प्रमुख सर्तका रूपमा इरानले युरेनियम सम्वर्द्धन गर्न नपाउने कुरा यथावत् राखिएको छ। इरानको लागि प्रस्तावित गैर-परमाणु ऊर्जा परियोजनामा खाडी मुलुकहरूको लगानी रहनेछ।

वार्तामा कतारले सक्रिय भूमिका खेलेको देखिन्छ। कतारले हालै इजरायल–इरानबीचको युद्धविराम सम्झौताका लागि पनि मध्यस्थता गरेको थियो। यसै सन्दर्भमा गत शुक्रवार व्हाइट हाउसमा अमेरिकी विशेष दूत स्टिभ विटकोफ र खाडी राष्ट्रहरूका प्रतिनिधिबीच गोप्य बैठकसमेत भएको थियो। उक्त बैठकमा प्रस्तावित सर्तहरूको विस्तृत छलफल गरिएको थियो। तर त्यही बैठकपछिको दिन अमेरिकाले इरानमा हवाई आक्रमण गरेको थियो, जसले परिस्थिति थप जटिल बनाएको छ। युद्धको तनावबीच वार्ता र आक्रमण सँगसँगै अघि बढिरहेका यस्ता घटनाहरूले अमेरिकी रणनीति बहुआयामिक बन्दै गएको संकेत दिन्छ।