खोज

सल्यान, १३ असार ।

कर्णाली प्रदेश सरकारले आर्थिक वर्ष २०८२/८३ का लागि सल्यान जिल्लामा एक करोड बढीका २६ विकास योजनामा बजेट विनियोजन गरेको छ । प्रदेश सरकारको नीति अनुसार सडक, पुल, खानेपानी, सिँचाइ, पर्यटन प्रवर्द्धन र सामाजिक पूर्वाधार निर्माण जस्ता क्षेत्रमा प्राथमिकता दिँदै चार वटा मन्त्रालयमार्फत योजनाहरू छनौट गरिएको हो ।

सबैभन्दा बढी १८ वटा योजना भौतिक पूर्वाधार तथा सहरी विकास मन्त्रालयमार्फत सञ्चालन हुनेछन् । प्रदेश सरकारको आर्थिक मामिला तथा योजना मन्त्रालयले सार्वजनिक गरेको वार्षिक विकास कार्यक्रममा सडक तथा पुलसँग सम्बन्धित १८ वटा ठुला योजनामा भौतिक पूर्वाधार तथा सहरी विकास मन्त्रालयले बजेट विनियोजन गरेको छ ।

यसै गरी खानेपानी तथा सिँचाइ सम्बन्धी ५ वटा योजनामा जलस्रोत तथा ऊर्जा विकास मन्त्रालय र ताल संरक्षण एवं पर्यटन प्रवर्द्धन सम्बन्धी २ वटा योजना उद्योग, पर्यटन, वन तथा वातावरण मन्त्रालयमार्फत बजेट विनियोजन गरिएको छ । सामाजिक विकास मन्त्रालय अन्तर्गत रहेको स्वास्थ्य सेवा कार्यालय सल्यानको भवन निर्माणमा पनि करोड बजेट रहेको छ ।
थारमारे–वडागाउँ–चौरजहारी सडक योजना सबैभन्दा ठूलो बजेट पाएको योजना हो । यस योजनामा १० करोड रुपैयाँ  विनियोजन गरिएको छ । भौतिक पूर्वाधार तथा सहरी विकास मन्त्रालय मार्फत कालीमाटी–रामपुर–रामबजार–लुहाम–सल्यान खलंगा जोड्ने सडकमा ६ करोड, सल्यान खलंगा–कालीमाटी–घुईयावारी–काप्रेचौर–कोहलपुर सडक योजनामा ४ करोड ४ लाख, त्रिवेणी–लुहाम–कालीमाटी–रामपुर सडक खण्डको काभ्रा–कालीमाटी सडक कालोपत्रेमा ४ करोड, मौलहाले–दार्मा–फारुला सडक स्तरोन्नतिमा ४ करोड रुपैयाँ  विनियोजन भएको छ ।

यस्तै चाख्लिघाट–त्रिवेणी घाट–कुमाख लेक–जिमाली–चिसापानी सडकमा ३ करोड, मर्मखोला–सानिपिप्ली मोटरेबल पुल, कुमाख गाउँपालिकामा रु २ करोड ५० लाख, सालचौर सडक पुल (शारदा नगरपालिका–९) मा २ करोड ५० लाख, बागचौर–पातीहाल्न सडक जंगारखोला पुलमा १ करोड ६० लाख, श्रीनगर–खैराबाङ मोटर बाटो स्तरोन्नतिका लागि १ करोड ६० लाख, बालुवा संग्रही–कुपिण्डे–खलंगा सडकमा १ करोड ५५ लाख तथा छत्रेश्वरी–त्रिवेणी जोड्ने कारेवास–रांसी झोलुंगे पुलमा १ करोड ५० लाख छुट्याइएको छ ।

यसैगरेर ढोरचौर, छापडाँडा, गैरीकटेरी, मैदुपोखरी, सल्लीबजार सडकका लागि १ करोड ५० लाख, कोटमौला–किमरे–पोखरी–खोरवारे–परिलेख सडक स्तरोन्नति (सुन्तला पकेट क्षेत्र) मा १ करोड, घुईयाबारी–गंगटे जोड्ने झोलुंगे पुल, कालिमाटी ७ मा १ करोड, सोलावाङ–रिम सडक स्तरोन्नति (कपुरकोट गाउँपालिका) मा १ करोड, स्वीकोट–नेटा–मर्म–परिकाँडा–जिमाली–चौरपानी सडक स्तरोन्नतिमा १ करोड र बागचौरको रारेचौर–खाली–चोरपानी–कुमाख–कालालेक–उचाल्ने–नाथे पिपल–सल्ली–सुर्खेत सडकमा १ करोड रुपिँया बजेट व्यवस्था गरिएको मन्त्रालयको वार्षिक विकास कार्यक्रममा उल्लेख छ

जलस्रोत तथा ऊर्जा विकास मन्त्रालयमार्फत मुलखोला थरा–कुपिण्डे पारी गाउँ–काउचे लिफ्ट खानेपानी योजना (बनगाड कुपिण्डे–८) मा ३ करोड ६० लाख, कालिमाटी सिँचाइ योजना निर्माणमा ३ करोड २० हजार, कुमाख खानेपानी योजनामा २ करोड ५० लाख, कालिमाटी खानेपानी योजनामा २ करोड, बनगाड कुपिण्डे वृहत खानेपानी योजनामा १ करोड २६ लाख रुपैयाँ  विनियोजन भएको छ ।

उद्योग, पर्यटन, वन तथा वातावरण मन्त्रालय अन्तर्गत कुपिण्डे ताल संरक्षण गुरु योजना कार्यान्वयनका लागि ४ करोड ९९ लाख ५३ हजार, कुपिण्डे दह जलाधार संरक्षण तथा पर्यटन प्रवर्द्धनमा ३ करोड ६० लाख रुपैयाँ  विनियोजन भएको छ भने सामाजिक विकास मन्त्रालयमार्फत स्वास्थ्य सेवा कार्यालय सल्यानको भवन निर्माणका लागि १ करोड विनियोजन भएको छ । यी सबै योजनाहरू कार्यान्वयन भएमा सल्यानको भौतिक पूर्वाधार, खानेपानी, सिँचाइ, पर्यटन क्षेत्र र स्वास्थ्य सेवा प्रवाहमा गुणात्मक परिवर्तन आउने अपेक्षा गरिएको छ ।