खोज

बर्दघाट, नवलपरासी (पश्चिम), १३ असार । पश्चिम नवलपरासीको बर्दघाट नगरपालिका–५ मा निर्माणाधीन नमूना उद्योग ग्रामको काम सम्पन्न भए पनि ठेकेदार कम्पनी अझै भुक्तानी नपाउँदा आर्थिक संकटमा परेको छ । मोक्तान रिलायन्स जेभीले करिब २ करोड २१ लाख रुपैयाँमा सम्झौता गरी बाटो, ढल, तटबन्धनलगायत पूर्वाधार निर्माण कार्य सम्पन्न गरिसकेको भए पनि अझै भुक्तानी नपाएको गुनासो गरेको हो ।

कम्पनी सञ्चालक सुरज ढुङ्गेलका अनुसार सम्झौताअनुसारको काम सम्पन्न भए पनि करिब १ करोड ८० लाख रुपैयाँको भुक्तानी बाँकी छ, तर अहिलेसम्म जम्मा भ्याट बाहेक ३५ लाखमात्र भुक्तानी भएको छ। बाँकी रकमको लागि उनी पटकपटक काठमाडौं धाउँदै मन्त्रालयसम्म पुगे पनि बजेट नै नभएको जवाफ पाएको बताए । “भएभरको सम्पत्ति, श्रीमतीको गहना राखेर ऋण लिएर काम गरियो । भुक्तानी नपाउँदा म घर न घाटको भएको छु,” ढुङ्गेलले गुनासो गरे ।

स्रोतका अनुसार उद्योग मन्त्रालयको योजना भए पनि बजेटको सुनिश्चितता नगरी ठेक्का दिइएको थियो । विशेष आर्थिक क्षेत्र प्राधिकरणका उपसचिव तुल्सिराम मरासिनीले भुक्तानीका लागि अर्थ मन्त्रालयमा रकमान्तरको प्रक्रिया अघि बढाइएको जानकारी दिए । “असार मसान्तसम्म भुक्तानी हुन सक्ने आशा छ,” उनले भने ।

२०७९/८० को असारमा सम्झौता भएको उक्त आयोजनाको शिलान्यास तत्कालिन उद्योग मन्त्री रमेश रिजाल एवं यसै क्षेत्रका सासद बिनोद चौधरीले गरेका थिए । तर, निर्माण सम्पन्न भइसकेको एक वर्ष पुग्नै लाग्दा पनि भुक्तानी रोकिएपछि योजनाको भविष्यबारे समेत प्रश्न उठ्न थालेको छ ।

स्थानीयबासीहरूका अनुसार भुक्तानीको अन्योलले व्यवसायिक क्षेत्र विस्तारको उत्साहमा पनि पानी छर्किएको छ । योजनाको अलपत्र अवस्था, ठेकेदारको आर्थिक संकट र सरकारले देखाएको उदासीनता योजनाको प्रभावकारितामै प्रश्न उठाउने विषय भएको उनीहरूको भनाइ छ ।